ភ្នំពេញ: កាលពីថ្ងៃទី៩ ខែមិថុនា ឆ្នាំ២០១០ នៅវិមានរដ្ឋាភិបាលរាជធានីភ្នំពេញ មានរៀបចំកិច្ចប្រជុំសេដ្ឋកិច្ចរបស់ គណៈកម្មាធិការជំរុញកិច្ចសហប្រតិបត្តិការទ្វេភាគីបារាំង-កម្ពុជា ក្រោមសហអធិបតីភាពលោក សុខ ចិន្តា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា និងលោកស្រី អាន-ម៉ារី អ៊ីដ្រាក់ រដ្ឋ លេខាធិការក្រសួងសេដ្ឋកិច្ច ឧស្សាហកម្ម និងការងារ ទទួលបន្ទុកពាណិជ្ជកម្មក្រៅ ប្រទេស ។យោងតាមសេចក្តីប្រកាសរបស់ស្ថានទូតបារាំងប្រចាំកម្ពុជាថ្ងៃទី៩ខែមិថុនានេះដែរបាននិយាយថាក្នុងកិច្ចប្រជុំនេះ មានការចូលរួមពីសំណាក់រដ្ឋមន្ត្រី និងរដ្ឋលេខាធិការ នៃក្រសួងទេសចរណ៍ ក្រសួងការបរទេស និងសហប្រតិបត្តិការអន្តរជាតិ ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រសួងប្រៃសណីយ៍ និងទូរគមនាគមន៍ ក្រសួងកសិកម្ម រុក្ខាប្រមាញ់ និងនេសាទ ធនាគារអភិវឌ្ឍន៍ជនបទ និងតំណាងក្រសួងស្ថាប័នពាក់ព័ន្ធ មួយចំនួនទៀត ។ ចូលរួមក្នុងឱកាសនោះដែរ មានវត្តមានអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និង ថ្នាក់ដឹកនាំសភាពាណិជ្ជកម្មកម្ពុជាមួយចំនួនទៀត ព្រមទាំងវត្តមានវិនិយោគិនបារាំងដែលកំពុងធ្វើសកម្មភាពនៅកម្ពុជា ។
ព្រឹត្តិការណ៍នេះ ធ្វើឡើងក្នុងក្របខ័ណ្ឌនៃដំណើរការជំរុញកិច្ចសហប្រតិបត្តិការបារាំង-កម្ពុជា ដែលត្រូវបាន ផ្តួចផ្តើមឡើងកាលពីខែកក្កដា ឆ្នាំ២០០៩ នៅក្នុងជំនួបរវាងសម្តេចនាយករដ្ឋមន្ត្រី ហ៊ុន សែន និងលោក នីកូឡា សាកូស៊ី ប្រធានាធិបតីនៃសាធារណរដ្ឋបារាំង ។ ក្នុងកិច្ចប្រជុំនេះ ប្រទេសទាំងពីរបានបញ្ជាក់ជាថ្មីឡើងវិញពី
ការសម្រេចរបស់ខ្លួន ក្នុងការកំណត់សកម្មភាព សហប្រតិបត្តិការ ដើម្បីជាប្រយោជន៍ដល់ការបង្កើតការងារ និងគាំទ្រដល់ការវិនិយោគប្រកបដោយផ្លែផ្កា ។ ការប្រជុំ ខាង លើអនុញ្ញាតឱ្យអ្នកចូលរួមអាចពិភាក្សាគ្នាអំពីសន្ទុះនៃការអភិវឌ្ឍន៍ប្រទេសកម្ពុជា ព្រមទាំងគោលនយោបាយជាតិ តាមវិស័យនីមួយៗ រួមមាន ៖ វិស័យកសិកម្ម ឧស្សាហកម្ម និងទេសចរណ៍ ។
ក្នុងឱកាសនោះ ភាគីបារាំងបានប្រគល់ជូនភាគីកម្ពុជានូវសៀវភៅស មួយក្បាល ស្តីពី ការវិនិយោគបារាំង និងការចូលទីផ្សារកម្ពុជា ដែលរៀបចំតាក់តែងឡើងដោយក្រុម ទីប្រឹក្សាពាណិជ្ជកម្មក្រៅប្រទេស នៃប្រទេសបារាំង ប្រចាំកម្ពុជា ។ ក្រៅពីនេះ ក៏មានការពិនិត្យផងដែរលើលទ្ធភាពធ្វើកិច្ចសហការថ្មីៗទៀត រវាងក្រុមហ៊ុនសហគ្រាស នៃប្រទេសទាំងពីរ ។
(ដកស្រង់ចេញពីគេហទំព័រ ខេមបូឌាអេចបេ្រសញូស៍)
No comments:
Post a Comment