ឧត្ដមនាវីនៃកងឆ្មាំឆ្នេរសមុទ្រមួយរូបរបស់អាមេរិក លោក THAD ALLEN ថ្លែងកាលពីថ្ងៃទី៩ មិថុនា ថា វិធានការចុង ក្រោយសំដៅទប់ទល់នឹងការធ្លាយប្រេងអណ្ដែតក្នុងឈូងសមុទ្រម៉ិចស៊ិក ពេលនេះអាចឱ្យគេប្រមូលប្រេងអណ្ដែតបានដល់ទៅ២,៣លានលីត្រក្នុងមួយថ្ងៃ ។ ការអះអាងនេះធ្វើឡើងខណៈដែលប្រធានាធិបតីអាមេរិក លោកបារ៉ាក់ អូបាម៉ា ត្រូវទៅកាន់តំបន់នេះជាលើកទី៤ ចាប់តាំងពីមានប្រេងធ្លាយអណ្ដែតមក ។ ឧត្ដមនាវីរូបនេះថ្លែងទៀតថា កំលាំងបន្ថែមកំពុងបញ្ជូនមកដើម្បីជួយប្រមូលប្រេងអណ្ដែត ។ លោកចង់និយាយសំដៅ ជាពិសេសពីការមកដល់នៃនាវាស៊ីឡែនមួយមកពីសមុទ្រខាងជើង ។ នាវានេះត្រូវចូលរួមក្នុងការដឹកប្រេងអណ្ដែតដែលប្រមូលចេញពីសមុទ្រ ។យោងតាមការវាយតម្លៃនាពេលថ្មីៗនេះថា ប្រេងដែលធ្លាយចេញពីទីតាំងខួងប្រេងរបស់ក្រុមហ៊ុនប្រេង BPអង់គ្លេស ដែលផ្ទុះឆេះ ហើយលិចបញ្ចេញប្រេងឆៅរវាងពី៩០លានលីត្រទៅ១៩៤លានលីត្រ ក្នុងទឹកនៃឈូងសមុទ្រម៉ិចស៊ិកក្រោយសោកនាដកម្មនេះពីថ្ងៃទី២០ មេសា មក ៕
(ដកស្រង់ចេញពីគេហទំព័រ កាសែតកោះសន្តិភាព)
No comments:
Post a Comment