ខេត្ដបន្ទាយមានជ័យ ៖ កាំភ្លើងអាកា១ដើម និងគ្រាប់ចំនួន១១១គ្រាប់ បង់ចំនួន៣ ត្រូវប្រជាពលរដ្ឋម្នាក់ ដែលទៅរកជីក កណ្ដុរនិងពស់ នៅចំណុចខាងត្បូងវិទ្យាល័យមានជ័យ ចំងាយប្រហែល៧០០ម៉ែត្រ ត្រើយស្ទឹងម្ខាងស្ថិតនៅក្នុងភូមិទំនប់ជ្រៃ សង្កាត់ទឹកថ្លា ក្រុងសិរីសោភ័ណ ប្រទះឃើញកាលពីវេលាម៉ោង៤និង៣០នាទីរសៀលថ្ងៃទី៩ មិថុនា ឆ្នាំ២០១០ ។ អ្នកប្រទះឃើញអាវុធ នោះឈ្មោះរិន ភារិទ្ធ ភេទប្រុស អាយុ២១ឆ្នាំ រស់នៅភូមិទំនប់ជ្រៃ។លោកមេភូមិទំនប់ជ្រៃ ប្រាប់លោកឧត្ដមសេនីយ៍ត្រីហ៊ុន ហ៊ាន ស្នងការនគរបាល ខេត្ដកាលពីព្រឹកថ្ងៃទី១០ ខែមិថុនា ឆ្នាំ ២០១០ នៅប៉ុស្ដិ៍ទឹកថ្លាថា នៅវេលាម៉ោង៤ និង៣០នាទីរសៀលថ្ងៃទី៩ ខែមិថុនា ប្រជាពលរដ្ឋឈ្មោះរិន ភារិទ្ធ បានទៅជីករកកណ្ដុរ និងពស់ប្រទះឃើញកាំភ្លើងអាកា១ដើម បង់៣ និងគ្រាប់ចំនួន១១១គ្រាប់ ។
បន្ទាប់ពីប្រទះឃើញនោះគេបានមកប្រាប់រូបលោក ហើយលោកក៏រាយការណ៍ជូននគរបាលប៉ុស្ដិ៍សង្កាត់ឱ្យយកទៅរក្សាទុក ។ តាមការសន្និដ្ឋានដំបូងរបស់លោកស្នងការថា កាំភ្លើងមានគុណភាពប្រហែល៧០% នោះត្រូវជនមិនស្គាល់មុខបំរុងធ្វើសកម្មភាពអ្វីម្យ៉ាង ប៉ុន្ដែដោយពេលវេលាមិនអំណោយផលក៏យកទៅកប់ទុកនៅទីនោះសិន ។ កាំភ្លើងនោះជនមិនស្គាល់មុខទើបតែ យកទៅកប់ទុកថ្មីៗនេះ ព្រោះកំណាត់តង់រុំ មានស្នាមរហែកថ្មីៗ ឯខ្សែនីឡុងចងរុំកាំភ្លើង នៅថ្មីដែរ ។
លោកឧត្ដមសេនីយ៍ត្រី ហ៊ុន ហ៊ាន បានថ្លែងអំណរគុណចំពោះលោក រិន ភារិទ្ធ ដែលជួបប្រទះអាវុធ ហើយរាយការណ៍ប្រាប់ អាជ្ញាធរមូលដ្ឋានដោយមិនទុកឱ្យវាធ្លាក់ ទៅដល់ដៃជនទុច្ចរិតឡើយ ។ ដើម្បីជាការលើកទឹកចិត្ដដល់ឈ្មោះរិន ភារិទ្ធ លោកអធិការនគរបាលក្រុងសិរីសោភ័ណបានជូន សារុងចំនួន២ និងប៊ីចេង១គីឡូក្រាម និងជូនលោកមេភូមិថវិកាចំនួន១០.០០០រៀល ផងដែរ ។(ដកស្រង់ចេញពីគេហទំព័រ កាសែតកោះសន្តិភាព)
No comments:
Post a Comment