តាមធម្មតាមូសគឺជាភ្នាក់ងារចំលងជំងឺ ប៉ុន្តែនៅថ្ងៃណាមួយមូសអាចត្រូវបានប្រើ ដើម្បីកំចាត់ជំងឺគ្រុនចាញ់ ក្រោយពីក្រុមអ្នកវិទ្យាសាស្ត្របានបង្កើតប្រភេទមូស តាមលក្ខណៈហ្សែនដែលអាចនាំយកវ៉ាក់សាំងទៅជាមួយ ។ ក្រុមអ្នកស្រាវជ្រាវបានកែប្រែ ក្រពេញទឹកមាត់របស់មូស Anopheles Stephenis ដែលគេឲ្យឈ្មោះថា “ អ្នកផ្តល់វ៉ាក់សាំងចេះហោះ ឬ Flying Vaccinator ” ដើម្បីឲ្យវាអាចផ្ទុកវ៉ាក់សាំង Leishmania នៅក្នុងទឹកមាត់របស់វា ។ សត្វមូសប្រភេទនេះជាភ្នាក់ងារចម្លងជំងឺគ្រុនចាញ់ដ៏ចំបងនេះ ត្រូវបានបង្ហាញនៅក្នុងការធ្វើតេស្ត ដើម្បីផ្ទេរវ៉ាក់សាំងនេះ ទៅអ្នកដែលត្រូវវាខាំនៅក្នុងករណីនេះ គេប្រើសត្វកណ្តុរក្នុងមន្ទីរពិសោធន៍ ដោយធ្វើឲ្យមូសនេះក្លាយទៅជាភ្នាក់ងារចម្លងវ៉ាក់សាំង ។
យោងតាមការស្រាវជ្រាវ ដែលចុះផ្សាយនៅក្នុងទិនានុប្បវត្តិ វិទ្យាសាស្ត្រអង់គ្លេសឈ្មោះ Insect Molecular Biology បានឲ្យដឹងថា ការខាំដោយសត្វមូស បានជួយបង្កើនអង្គបដិប្រាណនៅក្នុងខ្លួនសត្វកណ្តុរ ដោយបង្ហាញពីការស៊ាំទៅនឹងវ៉ាក់សាំងនេះ ប្រកបដោយការសិក្សាដែលដឹកនាំដោយ លោក សីហ្គេតូ យូស៊ីដា សាស្ត្រាចារ្យជំនួយមកពីសកលវិទ្យាល័យ Jichi Medical University ក្នុងប្រទេសជប៉ុន អាចត្រូវបានប្រើដើម្បីរៀបចំនូវយុទ្ធសាស្ត្រថ្មីមួយ ក្នុងការប្រយុទ្ធប្រឆាំងនឹងជំងឺគ្រុនចាញ់ ទូទាំងសកលលោក ។
កង្វះវ៉ាក់សាំងជំងឺគ្រុនចាញ់ដ៏មានប្រសិទ្ធភាពមានន័យថា ការគ្រប់គ្រងភ្នាក់ងារចម្លងជំងឺ បានក្លាយជាកម្មវត្ថុដ៏សំខាន់ ក្នុងការទប់ស្កាត់ជំងឺនេះ ។ លោក យ៉ូស៊ីដា បាននិយាយថា បន្ទាប់ពីការខាំ ប្រសិទ្ធភាពផ្នែកការពាររបស់ប្រព័ន្ធស៊ាំត្រូវបានបង្កើតឡើង ដូចគ្នាទៅនឹងការចាក់ថ្នាំបង្ការរោគធម្មតាដែរ ប៉ុន្តែគ្មានការឈឺចាប់ និងគ្មានការចំណាយប្រាក់ទេ ។ លើសពីនេះទៅទៀត ការបន្តឲ្យមូសខាំកាន់តែច្រើន នឹងរក្សាបាននូវកំរិតខ្ពស់នៃប្រព័ន្ធស៊ាំ តាមរយៈការបង្កើនតាមបែបធម្មជាតិ ។ ដូច្នេះសត្វល្អិតនេះប្តូរពីសត្វចង្រៃ ទៅជាសត្វមានប្រយោជន៍ ៕
(ដកស្រង់ចេញពីគេហទំព័រ ខេមបូឌាអេចបេ្រសញូស៍)
No comments:
Post a Comment