ភ្នំពេញ: អ្នករាយការណ៍ពិសេស ស្តីពី ស្ថានភាពសិទ្ធិមនុស្សនៅកម្ពុជា របស់អង្គការសហប្រជាជាតិ លោក ស៊ូយ៉ា ប្រសាទ ស៊ូប៊ឺឌី ( Surya P. Subedi ) បានមកដល់ទីក្រុងភ្នំពេញហើយ នាព្រឹកម៉ោង ៩ ថ្ងៃអង្គារ ទី៨ ខែមិថុនា ឆ្នាំ២០១០ ។ នេះបើតាមការបញ្ជាក់របស់មន្ត្រីអង្គការសហប្រជាជាតិ ប្រចាំកម្ពុជា ។
អ្នករាយការណ៍ពិសេស លោក ស៊ូយ៉ា ត្រូវបំពេញបេសកកម្មនៅកម្ពុជា ចាប់ពីថ្ងៃទី៨ ដល់ថ្ងៃទី១៧ ខែមិថុនា ឆ្នាំ២០១០ ។ នេះជាបេសកកម្មលើកទី៣ របស់លោក នៅកម្ពុជា ដើម្បីស្វែងយល់ពីស្ថានភាពសិទ្ធិមនុស្ស ដោយផ្តោតសំខាន់លើដំណើរការវិស័យយុត្តិធម៌ ។
សេចក្តីប្រកាសព័ត៌មានរបស់ការិយាល័យឧត្តមស្នងការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា បានបង្ហាញថា ដំណើរបេសកកម្មរបស់លោក ស៊ូយ៉ា ប្រសាទ ស៊ូប៊ឺឌី នៅក្នុងប្រទេសកម្ពុជា លើកទី៣នេះ គឺផ្តោតលើដំណើរការវិស័យយុត្តិធម៌ ។ អ្នករាយការណ៍ពិសេស ស្តីពី សិទ្ធិមនុស្សនៅកម្ពុជា គូសបញ្ជាក់ថា វិស័យយុត្តិធម៌ គឺស្ថាប័នដ៏សំខាន់ ដែលលោកនឹងបន្តវាយតម្លៃ ដើម្បីចូលរួមលើកស្ទូយ និងការពារសិទ្ធិមនុស្ស ។ ពោលគឺ ដើម្បីឲ្យមានការចូលរួមពីមនុស្សទូទៅ ដើម្បីធ្វើឲ្យមានប្រព័ន្ធយុត្តិធម៌មួយល្អ និងត្រឹមត្រូវ ។
នៅក្នុងបេសកកម្មលើកទី១ កាលពីឆ្នាំ ២០០៩ អ្នករាយការណ៍ពិសេសរូបនេះ បានផ្តោតជាសំខាន់ លើការស្វែងយល់ពីស្ថានការណ៍សិទ្ធិមនុស្សទូទៅនៅកម្ពុជា ក្រោយពីលោកត្រូវបានក្រុមប្រឹក្សាសិទ្ធិមនុស្សជ្រើសតាំង ឲ្យធ្វើជាអ្នករាយការណ៍ពិសេស ជំនួសតំណាងពិសេសរបស់អគ្គលេខាធិការអង្គការសហប្រជាជាតិ យ៉ាស្ហ ហ្គាយ ។ បេសកកម្មលើកទី២របស់លោក ស៊ូយ៉ា មកកាន់កម្ពុជា បានធ្វើឡើង នៅខែមករា ឆ្នាំ ២០១០ ដើម្បីតាមដាន និងពិនិត្យមើលប្រសិទ្ធភាពការងាររបស់ស្ថាប័នរដ្ឋទាំងឡាយ ដែលទទួលខុសត្រូវក្នុងការលើកស្ទួយ និងការពារនីតិរដ្ឋ និងដោះស្រាយ បញ្ហាសិទ្ធិមនុស្សរបស់ប្រជាជនកម្ពុជា ។
សេចក្តីប្រកាសព័ត៌មាន បានបង្ហាញថា ក្នុងបេសកកម្មរយៈពេល ១០ ថ្ងៃនេះ អ្នករាយការណ៍ពិសេស លោក ស៊ូយ៉ា នឹងចូលក្រាបបង្គំគាល់ព្រះមហាក្សត្រ សម្តេចព្រះបរមនាថ នរោត្តម សីហមុនី, ជួបសម្តេចនាយករដ្ឋមន្ត្រីហ៊ុន សែន, ជួបពិភាក្សាជាមួយនឹងមន្ត្រីរដ្ឋាភិបាលកម្ពុជា ជាពិសេស ក្រុមមន្ត្រីតំណាងឲ្យស្ថាប័ន ដែលមានការពាក់ព័ន្ធនឹងកំណែទម្រង់ច្បាប់និងយុត្តិធម៌ និងមន្ត្រីនៅក្រសួងយុត្តិធម៌, អង្គការសង្គមស៊ីវិល គណបក្សនយបាយ ក៏ដូចជា ប្រជាពលរដ្ឋ ដែលបានប្រើប្រាស់ប្រព័ន្ធតុលាការ ព្រមទាំងដៃគូអភិវឌ្ឍន៍នានា ដែលបានចូលរួមក្នុងវិស័យយុត្តិធម៌ នៅប្រទេសកម្ពុជា ៕
(ដកស្រង់ចេញពីគេហទំព័រ ខេមបូឌាអេចបេ្រសញូស៍)
No comments:
Post a Comment