ទីតាំងដែលរដ្ឋាភិបាលឡាវបានគ្រោងនឹងកសាងទំនប់វារីអគ្គិសនី ហ្សាយ៉ាបូរី ដែលគេរំពឹងថា
ជាទំនប់ទីមួយដែលត្រូវបានគេកសាងឡើងនៅអាងទន្លេមេគង្គក្រោម
ភ្នំពេញ: ការសិក្សាមួយរបស់គណកម្មាធិការទន្លេមេគង្គ បានអះអាងថា ទំនប់វារីអគ្គិសនីបានញែកទន្លេមេគង្គទាំងមូលជា ៦ កង់ធំៗ ។
របាយការណ៍ហេតុប៉ះពាល់បិរស្ថានបណ្តាលមកពីផែនការកសាងទំនប់វារីអគ្គិសនីដែលត្រូវបាន គណៈកម្មាធិការទន្លេមេគង្គធ្វើការសិក្សាហើយប្រកាសលទ្ធផលកាលពីពេលថ្មីៗនេះបានអះអាងថា ទន្លេ មេគង្គទាំងមូលត្រូវបានគេបែងចែកជា ៦កង់ ។ ដោយនៅក្នុងនោះចាប់ពីប្រភពរបស់វានៅខ្ពង់រាបទីបេទៅ ដល់តំបន់ត្រីកោណមាសគេហៅវាថា ជាតំបន់ទន្លេឡានសាង ។ កង់ទីពីរគឺពីឈាងសេន ទៅដល់ទីក្រុងវៀងចាន់ រដ្ឋធានីប្រទេសឡាវ ។ កង់ទីបី គឺពីវៀងចាន់ទៅដល់បាក់សេ នៅក្នុងទឹកដីឡាវ ។ កង់ទី៤ គឺពីបាក់សេ ទៅក្រចេះនៅក្នុងប្រទេសកម្ពុជា ។ កង់ទី៥ គឺពីក្រចេះទៅដល់រដ្ឋធានីភ្នំពេញ ។ និងកង់ទី៦ គឺ ពីរដ្ឋធានីភ្នំពេញទៅកាន់សមុទ្រចិនខាងត្បូង ។
ប្រភពខាងលើនេះបានឱ្យដឹងថា នៅក្នុងមួយកង់ៗមានលក្ខណៈពិសេស និងគម្រោងអភិវឌ្ឍន៍ ព្រមទាំងមានសក្តានុពលខុសៗគ្នា ។
កង់ទី១ ដែលគេហៅថា ទន្លេឡានសាង នេះមានបណ្តោញប្រមាណជា ១.៩០០ គម ទីនោះគ្មានមានដៃទន្លេទេ ។ ទន្លេមានសភាពតូចហូរខ្លាំង និងសំបូរទៅដោយថ្មពិបាកនៅក្នុងការធ្វើចរាចរណ៍ ប៉ុន្តែវាមានសក្តានុពលសំរាប់ចិនធ្វើការអភិវឌ្ឍន៍ទំនប់វារីអគ្គិសនី ។ សព្វថ្ងៃនេះមានទំនប់មួយចំនួនកំពុង តែត្រូវបានប្រទេសចិនទាញយកថាមពល និងកំពុងតែសាងសង់ទំនប់វារីអគ្គិសនី ហើយក៏កំពុងតែធ្វើការសិក្សាថែមទៀតផងដែរ ។
កង់ទី២ មានចំងាយប្រមាណជា ១.១០០ គម ។ ទីនោះទន្លេហូរកាត់តំបន់ភ្នំសំបូរទៅដោយព្រៃឈើ មានជ្រលងច្រើន ហើយភាគច្រើនគឺវាហូរតាមបណ្តោយព្រំដែនរវាងប្រទេសឡាវ និងប្រទេសថៃ ។ មកដល់ពេលនេះ រដ្ឋាភិបាលប្រទេសឡាវ និង ថៃបានលើកគម្រោងកសាងទំនប់វារីអគ្គិសនីចំនួនប្រមាណជា ៦ គម្រោង ។
កង់ទី៣ មានចំងាយប្រមាណជា ៦០០ គម ។ គឺជាតំបន់ដែលទន្លេទទួលរបបទឹកច្រើនពីដៃទន្លេផ្សេងៗ ។ សំបូរផ្លូវទឹក ហើយទន្លេហូរភាគច្រើនស្របនឹងព្រំដែនឡាវនិងថៃដដែល ។ ទីនោះមានគម្រោងកសាងទំនប់វារីអគ្គិសនីចំនួន ២ ។
កង់ទី៤ គឺមានចំងាយប្រមាណជា ៣០០ គម ។ ទីនោះគឺជាតំបន់ដែលមានទេសភាពស្អាត ហើយ កំពុងតែទាក់ទាញទេសចរណ៍ ដែលភាគច្រើនគេស្គាល់ថា ល្បាក់ខោន ។ ទឹកទន្លេនៅក្នុងតំបន់នោះ គឺជា ប្រភពសេដ្ឋកិច្ចដ៏សំខាន់សំរាប់ប្រជាពលរដ្ឋ ដោយសារតែទីនោះសំបូរត្រីឆ្លង់កាត់ និងពងកូន ។ ហើយ ក៏អាចនឹងធ្វើនាវាចរណ៍បានងាយស្រួល ។ មកដល់ពេលនេះកម្ពុជា និងប្រទេសឡាវបានលើកគម្រោងកសាងទំនប់វារីអគ្គិសនីចំនួន ៥ គម្រោង ។
កង់ទី ៥ មានចំងាយប្រមាណជា ២០០ គម ។ ទីនោះមានសារៈសំខាន់ផ្នែកអេកូឡូស៊ី ដោយសារ តែវាគឺជាតំបន់ដែលរបបទឹកមានទំនាក់ទំនងយ៉ាងជិតស្និតនឹងរបបទឹកនៅបឹងទន្លេសាប ។ មកដល់ពេល នេះតំបន់នេះទាំងមូលនៅមិនទាន់មានគម្រោងកសាងទំនប់វារីអគ្គិសនីទេ ។
កង់ទី៦ មានចំងាយប្រមាណជា ពី ១០០ ទៅ ១៥០ គម ។ ទីនោះភាគច្រើនគឺជាតំបន់ដែលមាន សក្តានុពលសំរាប់កសិកម្ម ដោយសារតែទឹកទន្លេមេគង្គត្រូវបានគេទាញយកប្រយោជន៍ជាច្រើនតាមរយៈ ការព្រែកជីកផ្សេងៗជាពិសេសនៅក្នុងប្រទេសវៀតណាម ៕
(ដកស្រង់ចេញពីគេហទំព័រ ខេមបូឌាអេចបេ្រសញូស៍)
No comments:
Post a Comment