Tuesday, June 15, 2010
អ្នកភូមិមកពីខេត្តកំពង់ចាម ស្នើឲ្យលោក ហ៊ុន សែន អន្តរាគមន៍រឿងដីធ្លី
ប្រជាពលរដ្ឋចំនួន ៨០នាក់ កំពុងតវ៉ារឿងដីធ្លីនៅមុខវត្តបទុមវតី ក្នុងទីក្រុងភ្នំពេញ កាលពីថ្ងៃទី១៤ មិថុនា ២០១០
នៅថ្ងៃច័ន្ទ ទី១៤ ខែមិថុនានេះ នៅមុខវត្តបទុមវតី និងនៅមុខគេហដ្ឋានរបស់លោកនាយករដ្ឋមន្ត្រី ហ៊ុន សែន ប្រជាពលរដ្ឋជាច្រើនរយគ្រួសារមកពីខេត្តកំពង់ចាម បានទទូចសុំឲ្យប្រមុខរដ្ឋាភិបាលជួយអន្តរាគមន៍ ចំពោះការប្រឈមមុខនឹងការបាត់បង់ដីស្រែចម្ការ និងទីលំនៅរបស់ពួកគាត់។
ប្រជាពលរដ្ឋខ្មែរចំនួន ៨០នាក់ តំណាងឲ្យគ្រួសាររងគ្រោះ ចំនួនសរុប ១៣៦គ្រួសារ នៅក្នុងស្រុកមេមត់ ខេត្តកំពង់ចាម នៅថ្ងៃច័ន្ទ ទី១៤ ខែមិថុនានេះ បាននាំគ្នាអង្គុយរង់ចាំដោយស្ងៀមស្ងាត់ រយៈពេល ២ថ្ងៃមកហើយ តាំងពីថ្ងៃអាទិត្យមក នៅមុខវត្តបទុមវតី នៅក្នុងទីក្រុងភ្នំពេញ ដើម្បីសុំឲ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ប្រគល់ដីធ្លីជាង ២០០ហិកតារ មកឲ្យពូកគាត់វិញ ដោយសារតែដីធ្លីនេះ បានរងការរឹបអូសយកដោយលោក ហែម ខន។
ក្រុមប្រជាពលរដ្ឋអ្នកតវ៉ាពីបញ្ហាដីធ្លី បានឲ្យដឹងទៀតថា ពួកគាត់មិនមានស្បៀងអាហារសម្រាប់បរិភោគ សម្រាប់រយៈពេលច្រើនថ្ងៃទេ ក្នុងការរង់ចាំរកដំណោះស្រាយនោះ។
ការមកសំដែងការតវ៉ា ជុំវិញសំណុំរឿងដីធ្លី របស់ប្រជាពលរដ្ឋនានា នៅក្នុងទីក្រុងភ្នំពេញជាបន្តបន្ទាប់មកនេះ គឺស្របពេលដែលអ្នករាយការណ៍ពិសេស ស្ដីពីស្ថានភាពសិទ្ធិមនុស្សនៅកម្ពុជា លោក Surya Subedi កំពុងតែបំពេញទស្សនកិច្ចលើកទី៣ នៅក្នុងប្រទេសកម្ពុជា ហើយលោកមានគម្រោងការជួបជាមួយលោកនាយករដ្ឋមន្ត្រី ហ៊ុន សែន នៅថ្ងៃទីព្រហស្បតិ៍ ទី១៧ ខែមិថុនា ឆាប់ៗនេះ នៅឯទីស្ដីការគណៈរដ្ឋមន្ត្រី។
ប្រជាពលរដ្ឋ ឈ្មោះ ភេត ចាន់ថន អាយុ៥៣ឆ្នាំ មកពីភូមិសោមចាន់ ឃុំគុំពាន់ ស្រុកមេមត់ ខេត្តកំពង់ចាម បានថ្លែងថា ប្រជាពលរដ្ឋរស់នៅលើដីនោះ តាំងពីដូនតាមក និងឆ្នាំ១៩៧៩មក ប៉ុន្តែលោក ហែម ខន បានប្ដឹងរឹបអូសយកដីធ្លីនោះ នៅក្នុងឆ្នាំ២០០៦ ហើយបានឈ្នះក្តីទៀត។
លោកមានប្រសាសន៍បន្តថា ៖ «ឲ្យសម្ដេចជួយធ្វើម៉េច ឲ្យបានដីហ្នឹង ឲ្យកូនចៅធ្វើវិញ ហើយកុំឲ្យគេប្ដឹងផ្ដល់ កុំឲ្យគេដេញចាប់។ អ៊ីចឹងរវល់តែភ័យ អត់បានធ្វើអី ផ្ទះក៏គេឲ្យរុះ ដំណាំកៅស៊ូស្វាយគេឲ្យកាប់ចេញ។ ហើយប្រជាពលរដ្ឋមិនដឹងជាមានអី»។
ប្រជាពលរដ្ឋចំនួន ៥នាក់ ដែលបានរងការប្តឹងដោយឈ្មោះ ហែម ខន កំពុងតែរត់លាក់ខ្លួនពីផ្ទះសំបែង។
ប្រជាពលរដ្ឋម្នាក់ទៀត ឈ្មោះ ជ្រះ យ៉ោក អាយុ៥២ឆ្នាំ ត្រូវបានសមត្ថកិច្ចចាប់ខ្លួនកាលពីខែឧសភាថ្មីៗនេះ ដាក់ក្នុងពន្ធនាគារ។
ប្រជាពលរដ្ឋ ឈ្មោះ ចាប ថេន អាយុ៣៥ឆ្នាំ នៅក្នុងចំណោមប្រជាពលរដ្ឋមកតវ៉ារឿងដីធ្លីខាងលើនេះ បានថ្លែងថា ៖ «ធ្លាប់ប្ដឹងប្រជាពលរដ្ឋ ឈ្មោះគេ ហែម ខន តែមិនដឹងមុខលោក ហែម ខន ហ្នឹងដូចម៉េចទេ មុខលោក ហែម ខន ហ្នឹង»។
វិទ្យុអាស៊ីសេរី បានទាក់ទងទៅលោក ប៊ុន សុខ មន្ត្រីខុទ្ទកាល័យរបស់លោកនាយករដ្ឋមន្ត្រី ហ៊ុន សែន ដើម្បីសាកសួរ ថាតើនឹងមានការជួយដោះស្រាយបែបណា ដល់គ្រួសារប្រជាពលរដ្ឋទាំងនោះ ប៉ុន្តែលោកមិនបានឆ្លើយនឹងសំណួរនោះទេ ហើយបិតទូរស័ព្ទ។
ឯកសារសាលក្រម ដែលវិទ្យុអាស៊ីសេរីទទួលបាន បានឲ្យដឹងថា កាលពីខែធ្នូ ឆ្នាំ២០០៦កន្លងទៅ តុលាការខេត្តកំពង់ចាម បានកាត់សេចក្ដី ឲ្យលោក ហែម ខន ឈ្នះក្តី ក្នុងនាមដើមបន្តឹង ប្ដឹងប្រជាពលរដ្ឋចំនួន ៦នាក់ ដើម្បីរឹបយកដីធ្លី។ តុលាការបានបង្គាប់ឲ្យប្រជាពលរដ្ឋចាញ់ក្តីទាំងនោះ រួមគ្នាសងជំងឺចិត្តលោក ហែម ខន ចំនួន១០លានរៀល។
ប្រជាពលរដ្ឋ ដែលមកតវ៉ា បានឲ្យដឹងថា ពួកគាត់បានប្ដឹងតវ៉ាទៅអាជ្ញាធរមូលដ្ឋាននានា ប្ដឹងមកខុទ្ទកាល័យរបស់លោក ជា ស៊ីម ប្រធានព្រឹទ្ធសភា លោក ហេង សំរិន ប្រធានសភាជាតិ ប៉ុន្តែគ្មានដំណោះស្រាយទេ។ ប្រជាពលរដ្ឋមិនស្គាល់ឈ្មោះ ហែម ខន នោះជានរណាទេ ហើយមានឋានៈជាអ្វីឡើយ។
ពួកគាត់បានថ្លែងថា ការមកតវ៉ាសុំកិច្ចអន្តរាគមន៍ ពីមន្ត្រីខុទ្ទកាល័យរបស់លោកនាយករដ្ឋមន្ត្រី ហ៊ុន សែន នាពេលនេះ គឺជាជម្រើសចុងក្រោយរបស់ពួកគាត់៕
(ដកស្រង់ចេញពីគេហទំព័រ វិទ្យុអាស៊ីសេរី)
អាជ្ញាធររារាំងមិនឲ្យអ្នកតវ៉ារឿងដីធ្លីទៅកាន់ផ្ទះលោក ហ៊ុន សែន
អាជ្ញាធររារាំងមិនឲ្យអ្នកតវ៉ារឿងដីធ្លីទៅកាន់ផ្ទះលោក ហ៊ុន សែន កាលពីថ្ងៃទី១៥ មិថុនា ២០១០
ប្រជាពលរដ្ឋខ្មែរចំនួនប្រមាណ ២០០នាក់ មកពីសហគមន៍ចំនួន ២៤នៅទូទាំងប្រទេសកម្ពុជា នៅថ្ងៃអង្គារ ទី១៥ ខែមិថុនានេះ បានមកប្រមូលផ្ដុំគ្នា នៅមុខវត្តបទុមវតី នៅក្នុងទីក្រុងភ្នំពេញ ដើម្បីសំដែងការតវ៉ា និងស្នើសុំឲ្យលោកនាយករដ្ឋមន្ត្រី ហ៊ុន សែន ជួយដោះស្រាយនិងបញ្ឈប់ការផ្ដល់ដីសម្បទាន ការរឹបអូសយកដីធ្លីពីប្រជាពលរដ្ឋក្រីក្រ ព្រមទាំងបញ្ឈប់ការកាប់ព្រៃឈើខុសច្បាប់ និងការនេសាទខុសច្បាប់ ដែលញាំងឲ្យហិនហោចធនធានធម្មជាតិនៅកម្ពុជា។
អាជ្ញាធរក្រុងភ្នំពេញ បានដាក់ពង្រាយកងកម្លាំងនគរបាលចម្រុះ ប្រមាណជាង ១០០នាក់ និងកងកម្លាំងនគរបាលអន្តរាគមន៍ ជាង ៥០នាក់ មានខែល និងដំបងឆក់ឈរជាជួរ ដើម្បីរារាំងមិនឲ្យប្រជាពលរដ្ឋដើរដង្ហែក្បួនចេញពីមុខវត្តបទុមវតី ទៅកាន់គេហដ្ឋានរបស់លោកនាយករដ្ឋមន្ត្រី ហ៊ុន សែន មិនឆ្ងាយប៉ុន្មានពីគ្នា។
ប្រជាពលរដ្ឋមួយចំនួន កាន់បដាសរសេរថា រួមគ្នាការពារព្រៃឈើ និងធនធានធម្មជាតិ និងខ្លះទៀតកាន់រូបថត របស់លោកនាយករដ្ឋមន្ត្រី ហ៊ុន សែន និងលោកជំទាវ ប៊ុនរ៉ានី ហ៊ុន សែន នៅក្នុងការឈរតវ៉ានៅមួយកន្លែង នៅថ្ងៃអង្គារ ទី១៥ ខែមិថុនានេះ។
ក្រុមប្រជាពលរដ្ឋតវ៉ា បានរំសាយគ្នាវិញ ដោយពុំមានកើតមានអំពើហិង្សាអ្វីទេ។ ការមកតវ៉ាផ្ដុំគ្នាមកពី ២៤ខេត្តក្រុងនេះ នៅស្របពេលដែលអ្នករាយការណ៍ពិសេសរបស់ អ.ស.ប. ទទួលបន្ទុកសិទ្ធិមនុស្ស នៅក្នុងប្រទេសកម្ពុជា លោក ស៊ូយ៉ា ស៊ូប៊ែឌី (Surya Subedi) កំពុងតែបំពេញទស្សនកិច្ចលើកទី៣ រយៈពេល ១០ថ្ងៃ នៅក្នុងប្រទេសកម្ពុជា។
លោកមានគម្រោងការជួបជាមួយលោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍ ទី១៧ ខែមិថុនា ឆាប់ៗនេះ នៅឯទីស្ដីការគណៈរដ្ឋមន្ត្រី ផ្ដោតលើបញ្ហាជាច្រើន រាប់ទាំងបញ្ហាដីធ្លី ប្រព័ន្ធតុលាការ និងការរំលោភសិទ្ធិមនុស្សនានាកន្លងមក៕
(ដកស្រង់ចេញពីគេហទំព័រ វិទ្យុអាស៊ីសេរី)
អង្គការលីកាដូថា តុលាការខេត្តកំពង់ឆ្នាំងឃុំខ្លួនមនុស្សហួសថេរវេលា
គេហទំព័ររបស់អង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកដូ (LICADHO)។
តុលាការខេត្តកំពង់ឆ្នាំង បានមានប្រតិកម្មចំពោះរបាយការណ៍របស់អ្នកស៊ើបអង្កេតអង្គការលីកាដូ ដែលថា មានការឃុំខ្លួនជនជាប់ចោទបណ្ដោះអាសន្នលើសនីតិវិធីច្បាប់។
តុលាការខេត្តកំពង់ឆ្នាំង បានច្រានចោលតួលេខនៃការឃុំខ្លួនជនជាប់ចោទបណ្ដោះអាសន្ន លើសនីតិវិធីច្បាប់ ដែលអង្គការលីកាដូបានលើកឡើងក្នុងរបាយការណ៍របស់ខ្លួន នាពេលថ្មីៗកន្លងទៅ។
ព្រះរាជអាជ្ញាអមសាលាដំបូងខេត្តកំពង់ឆ្នាំង លោក ពេញ វិបុល មានប្រសាសន៍ប្រាប់វិទ្យុអាស៊ីសេរី នៅព្រឹកថ្ងៃទី១៤ មិថុនាថា តួលេខដែលមន្ត្រីស៊ើបអង្កេតអង្គការលីកាដូ បានលើកឡើងមកនោះ គឺជាតួលេខមិនពិតឡើយ។ លោកបន្តថា ក្នុងខេត្តកំពង់ឆ្នាំង ពុំមានករណីការឃុំខ្លួនជនជាប់ចោទបណ្ដោះអាសន្នលើស នីតិវិធី ដូចក្នុងរបាយការណ៍របស់អង្គការការពារសិទ្ធិមនុស្សលីកាដូនោះទេ។
លោកមានប្រសាសន៍បន្តថា ៖ «ខ្ញុំមិនអាចទទួលយកបាន នូវរបាយការណ៍របស់អង្គការលីកាដូ ដែលលើកឡើងថា នៅក្នុងខេត្តកំពង់ឆ្នាំងនេះ បានឃុំខ្លួនជនជាប់ចោទហួសថេរវេលាកំណត់ ចំនួន ១៩នាក់ តាំងពីខែមករា ដល់ខែមេសា ២០១០ នោះទេ។ ដោយហេតុថា កន្លងមកនេះ ខ្ញុំបានទទួលរបាយការណ៍ពីពន្ធនាគារខេត្ត នៅថ្ងៃទី៦ ឧសភា ឆ្នាំ២០១០ ថា មានការឃុំខ្លួនជនជាប់ចោទហួសថេរវេលាកំណត់តែ៨នាក់ទេ»។
លោកសំណូមពរឲ្យគ្រប់អង្គការ ដែលពាក់ព័ន្ធមេត្តាមកទាក់ទងជាមួយតុលាការ ដើម្បីទទួលបាននូវរបាយការណ៍ពេញលេញ ត្រឹមត្រូវ មុននឹងយកទៅប្រើប្រាស់វាជាផ្លូវការនោះ។
របាយការណ៍របស់អង្គការលីកាដូបង្ហាញថា នៅដើមឆ្នាំ២០១០ នេះ គឺចាប់ពីខែមករា ដល់ខែមេសា អង្គការលីកាដូបានរកឃើញថា តុលាការនៅបណ្ដាខេត្តមួយចំនួន បានឃុំខ្លួនជនជាប់ចោទបណ្ដោះអាសន្នលើសនីតិវិធីចំនួន ៩២ករណី។ ក្នុងនោះ នៅខេត្តព្រះសីហនុ មាន ៤ករណី ខែត្រកំពង់ស្ពឺ ២២ករណី កំពង់ឆ្នាំង ១៩ករណី កំពង់ធំ ៤ករណី ពោធិ៍សាត់ ៤១ករណី និងស្វាយរៀង ២ករណី។
មន្ត្រីអង្គការសិទ្ធិមនុស្សលីការដូ លោក អំ សំអាត បានអះអាងប្រាប់វិទ្យុអាស៊ីសេរី នៅព្រឹកថ្ងៃទី១៤ មិថុនាថា ករណីនៅខេត្តកំពង់ឆ្នាំង អាចមានការយល់ច្រឡំគ្នា ចំពោះថិរវេលានៃរបាយការណ៍នោះ។ លោកបន្តថា តួលេខដែលលោកបានលើកយកមកនិយាយ គឺគិតចាប់ពីខែមករា ដល់ខែមេសា ឆ្នាំ២០១០។ ឯការបំភ្លឺរបស់ព្រះរាជអាជ្ញា គឺនៅដើមខែមិថុនា។
លោកថា ចំនួនអាចមានការថយចុះ ក្នុងរយៈពេលចុងក្រោយនេះ ៖ «តាមការចេញផ្សាយថា ១៩នោះ បើតាមយើងមើលពីខែ១ ដល់ខែបួននោះ ខ្ញុំថាខ្ញុំយកតែមធ្យមភាគផងទេ»។
នាយកប្រតិបត្តិអង្គការក្រុមអ្នកច្បាប់ការពារសិទ្ធិកម្ពុជា លោក សុក សំអឿន មានប្រសាសន៍ថា ជារឿយៗគេតែងសង្កេតឃើញមានឃុំខ្លួនជនជាប់ចោទបណ្ដោះអាសន្នលើសនីតិវិធី នៅបណ្ដាខេត្តមួយចំនួននោះមែន។ យ៉ាងណាក៏ដោយ លោកបានក្រើនរំលឹកអំពីនីតិវិធីនៃការឃុំខ្លួនថា ចំពោះបទឧក្រិដ្ឋ ចៅក្រមស៊ើបសួរ អាចធ្វើការឃុំខ្លួនជនជាប់ចោទបណ្តោះអាសន្នរយៈពេល ៦ខែ ប៉ុន្តែបើសិនជាការស៊ើបអង្កេតមិនទាន់បញ្ចប់ ចៅក្រមមានសិទ្ធិបន្តឃុំខ្លួនបណ្តោះអាសន្ន ២ដងទៀត សរុបចំនួន ១៨ខែ។
ការបន្តឃុំខ្លួននេះ ត្រូវមានដីកាបន្តឃុំខ្លួន និងមូលហេតុច្បាស់លាស់។ រីឯបទល្មើសមជ្ឈិម អាចឃុំខ្លួនបានពី ៤ ទៅ៦ខែ។ លោក សុក សំអឿនបន្តថា ការឃុំខ្លួនលើសនីតិវិធី គឺជាការរំលោភច្បាប់ និងរំលោភសិទ្ធិមនុស្ស៕
(ដកស្រង់ចេញពីគេហទំព័រ វិទ្យុអាស៊ីសេរី)
សង្គមស៊ីវិលថ្កោលទោសអាជ្ញាធរខែត្រតាកែវជុំវិញរឿងព្រំដែន
រូបថតផ្ដល់ដោយក្រុមអ្នកបច្ចេកទេសខណ្ឌសីមាបង្គោលព្រំដែនគោកកម្ពុជាទី៤
បង្គោលតម្រុយកំណត់ព្រំដែនកម្ពុជា-វៀតណាម លេខ២៧០ នៅភូមិអញ្ចាញ ឃុំជ័យជោគ ស្រុកបុរីជលសា ខេត្តតាកែវ ដែលអ្នកស្រុកអះអាងថា បោះនៅលើដីស្រែពួកគាត់។
ក្រុមប្រឹក្សាឃ្លាំមើលកម្ពុជាបានចេញសេចក្ដីថ្លែងការណ៍មួយនៅថ្ងៃ១៤ មិថុនានេះ ថ្កោលទោសអាជ្ញាធរខេត្តតាកែវ ក្នុងការរារាំងមិនឲ្យពលរដ្ឋចូលមើលតម្រុយបង្គោលព្រំដែន ក្រោយពីមានរបាយការណ៍ថា ការបោះបង្គោលនៅក្នុងស្រុកបុរីជលសា បានប៉ះពាល់ដីស្រែពលរដ្ឋ។
មន្ត្រីជាន់ខ្ពស់ទទួលបន្ទុកកិច្ចព្រំដែន លោក វ៉ា គឹមហុង បានបដិសេធនៅថ្ងៃច័ន្ទ ទី១៤ មិថុនានេះ ថា អាជ្ញាធរមិនបានបិទបាំង មិនឲ្យមានការឃ្លាំមើលការបោះបង្គោលតម្រុយព្រំដែនកម្ពុជាវៀតណាមឡើយ ប៉ុន្តែការរារាំងកន្លងមកនេះបានធ្វើឡើងដោយសារគេកំពុងការពារមិនឲ្យមានការបំផ្លាញបង្គោលតម្រុយនោះប៉ុណ្ណោះ។
លោក វ៉ា គឹមហុង ប្រធានគណៈកម្មការជាតិទទួលបន្ទុកកិច្ចការព្រំដែន ថ្លែងថា បង្គោលនោះគឺជាបង្គោលដែលគេបានធ្វើឡើងទ្វេភាគី ប្រើពេលអស់ ២ឆ្នាំ ហើយបើសិនជាមានការបំផ្លាញនោះ វានឹងនាំឲ្យមានបញ្ហាច្រើន ដូច្នេះហើយទើបគេរង់ចាំឲ្យមានការបោះឲ្យបានស្រេចបាច់ ដើម្បីបើកឲ្យមើលជាសាធារណៈ។
លោក វ៉ា គឹមហុង បានបញ្ជាក់ថា ៖ «ដើរជាន់ បាក់ខូច ទៅដក រពឹសដៃដូចមុន ទៅដកចោលរបស់ខ្ញុំទៅ! យើងខាតលុយអស់ច្រើនណាស់ មួយឆ្នាំ ពីរឆ្នាំ យើងធ្វើការទម្រាំបានទីតាំងហ្នឹង ហើយទៅដកចោល! ដល់គេមានវិធានការ ថារដ្ឋាភិបាលអាក្រក់ រដ្ឋាភិបាលកាច... ច្បាប់មានហើយតើ! គេថា អត់មានហាមឃាត់ទេ ប៉ុន្តែលុះត្រាតែបង្គោលនោះបានបោះរួច ជាបង្គោលអចិន្ត្រៃយ៍»។
លោក វ៉ា គឹមហុង ថ្លែងបារម្ភខ្លាចមានការបំផ្លាញតម្រុយបង្គោលព្រំដែនយ៉ាងដូច្នេះ បានធ្វើឡើងក្រោយពីក្រុមប្រឹក្សាឃ្លាំមើលកម្ពុជា បានចេញសេចក្ដីថ្លែងការណ៍ចំហមួយ នៅថ្ងៃដដែលនេះ ថ្កោលទោសអាជ្ញាធរមូលដ្ឋាន ដែលបានរារាំងពួកគេមិនឲ្យចូលមើលបង្គោលព្រំដែនលេខ២៧០ នៅក្នុងភូមិអញ្ចាញ ឃុំជ័យជោគ ស្រុកបុរីជលសា ខេត្តតាកែវ។
លោក ស្រី បេន អភិបាលខេត្តតាកែវ បានបញ្ជាក់បន្ថែមថា អាជ្ញាធរមូលដ្ឋានគ្រាន់តែចង់ការពារមិនឲ្យមានការប៉ះពាល់ទៅដល់សន្តិសុខផ្នែកសតិអារម្មណ៍របស់ប្រជាពលរដ្ឋ។
លោក ស្រី បេន បានមានប្រសាសន៍ថា ៖ «គេធ្វើអី ការងារការពារសន្តិសុខជូនប្រជាពលរដ្ឋរស់នៅសុខសាន្តអ៊ីចឹងទៅ! ភារកិច្ចគេអ៊ីចឹងណា៎! ហើយក្រៅពីការពារសន្តិសុខសណ្ដាប់ធ្នាប់ជូនប្រជាពលរដ្ឋ ឲ្យសុខសាន្តទាំងកម្លាំងកាយ និងសតិអារម្មណ៍ គេធ្វើការងាររបស់គេ គេដឹងតើ! គេមានអាជីព វិជ្ជាជីវៈ»។
បើទោះបីជាមានការបកស្រាយដូច្នេះក្ដី ការរារាំងនេះត្រូវបានក្រុមប្រឹក្សាឃ្លាំមើលចោទប្រកាន់ថា ជាការបំបិទសិទ្ធិរបស់ប្រជាពលរដ្ឋ ក្នុងការធ្វើដំណើរដោយសេរី និងការខ្វាយខ្វល់អំពីបញ្ហាទឹកដីរបស់ខ្លួន។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ និងប្រធានក្រុមប្រឹក្សាឃ្លាំមើលកម្ពុជាមានប្រសាសន៍ថា ពួកគេចង់ស្វែងយល់អំពីរឿងនេះ ៖ «គ្រាន់តែជាការអះអាងដើម្បីលាក់បាំងនូវការពិតតែប៉ុណ្ណោះ! ហើយបើសិនជាយើងចង់ច្បាស់ យើងទៅមើលទាំងអស់គ្នា មិនចាំបាច់ប្រើប្រាស់កម្លាំងអាជ្ញាធរ បញ្ជាឲ្យឃាត់ដំណើរអ្នកតំណាងរាស្ត្រ ក៏ដូចជាតំណាងអង្គការសង្គមស៊ីវិល ជាពិសេសប្រតិភូក្រុមប្រឹក្សាឃ្លាំមើលកម្ពុជា ដែលធ្វើដំណើរដឹកនាំដោយរូបខ្ញុំផ្ទាល់ នៅថ្ងៃទី១៣ (មិថុនា)»។
កាលពីថ្ងៃអាទិត្យកន្លងទៅនេះ ក្រុមប្រឹក្សាឃ្លាំមើលកម្ពុជាដែលមានគ្នាចំនួន ៦នាក់សុទ្ធសឹងតែជាគ្រូបង្រៀន បាននាំគ្នាចូលទៅមើលតម្រុយព្រំដែនលេខ២៧០ ក្រោយពីមានព័ត៌មានថា បង្គោលតម្រុយព្រំដែននោះបានបោះចូលទៅក្នុងដីខ្មែរប្រហែល ១៥០ម៉ែត្រ។
មកដល់ចំណុចភូមិដើមត្រសេក ចម្ងាយប្រមាណ ១គីឡូម៉ែត្រពីបង្គោលតម្រុយព្រំដែននោះ ក្រុមអ្នកឃ្លាំមើលក៏ត្រូវបានប៉ូលិសឃាត់។
នេះជាការឃាត់ឃាំងមិនឲ្យចូលទៅជិតព្រំដែនលេខ២៧០ លើកទី២ហើយ ក្រោយពីក្រុមតំណាងរាស្ត្របក្សប្រឆាំងព្យាយាមចូលទៅជិតកន្លែងនោះម្ដងរួចទៅហើយ កាលពីដើមខែមិថុនាកន្លងទៅ។
បើទោះបីជាមានការចោទប្រកាន់ មន្ត្រីទទួលបន្ទុកកិច្ចការព្រំដែនបានមានប្រសាសន៍ដដែលៗថា ពួកគេធ្វើការងារនេះយ៉ាងត្រឹមត្រូវ ហើយបើសិនជាមានការមិនសុខចិត្ត គេសូមឲ្យមានការតវ៉ាតាមរយៈរដ្ឋសភា៕
(ដកស្រង់ចេញពីគេហទំព័រ វិទ្យុអាស៊ីសេរី)
សហជីព២ធ្វើកូដកម្មច្រៀងអាយ៉ៃដាក់គ្នា នៅរោងចក្រកាត់ដេរ OCEAN
ភ្នំពេញ: កូដកម្មអហិង្សាមួយបានកើតឡើង នៅរោងចក្រកាត់ដេរ OCEAN Garment Co, LTD ដែលមានទីតាំងស្ថិតនៅផ្លូវបេតុង ភូមិព្រៃទា សង្កាត់ចោមចៅ ខណ្ឌដង្កោ កាលពីព្រឹកថ្ងៃទី១៤ មិថុនានេះ ដោយមានសហជីពចំនួន២ តំណាងឲ្យកម្មករសរុបប្រមាណ ៣៥០០នាក់ បានដាក់ក្បាលមេក្រូទល់មុខគា្ន ជេរបញ្ចោរគ្នាដោយសំអាងហេតុផលរៀងៗខ្លួន ។
ភាគីម្ខាងគឺសម្ព័ន្ធសហជីព ចលនាកម្មករ ដឹកនាំដោយលោក ប៉ាវ ស៊ីណា ។ ចំណែកភាគីម្ខាងទៀត គឺសហជីពសេរីកម្មករ នៃព្រះរាជាណាចក្រកម្ពុជា ដឹកនាំដោយលោក ម៉ាន់ សេងហាក់ ដោយលោកថៅកែរោងចក្រជាជនជាតិបង់ក្លាដែស ។ កម្មករកម្មការិនីប្រមាណ ៣៥០០នាក់ គ្នាចេញធ្វើកូដកម្មអហិង្សា នៅពេញមុខរោងចក្រ ។
លោក ម៉ាន់ សេងហាក់ បាននិយាយថា សហជីពរបស់លោក បានទាមទារដល់លោកថៅកែរោងចក្រ នៅថ្ងៃបើកប្រាក់ខែ សុំឲ្យកម្មករឈប់សម្រាកពីការងារនៅម៉ោង ៤ល្ងាច ដើម្បីបើកប្រាក់ខែ ។ ប៉ុន្តែសំណើនេះត្រូវបានខាងរោងចក្របដិសេធ និងចោទប្រកាន់មេដឹកនាំសហជីព ៧រូបថា ជាអ្នកបះបោរ ហើយចេញសេចក្តីសម្រេចព្យួរការងារ មានឈ្មោះ សន ភេទប្រុស, ឃឹម សុធា ភេទប្រុស, កៅ សុខុម ភេទប្រុស, ចេង សុវណ្ណី ភេទស្រី, យិន សុរ៉ាម ភេទស្រី, ម៉ៅ សុផាត ភេទស្រី, និងឈ្មោះ មួង សុផាត ភេទស្រី ។
លោក ម៉ាន់ សេងហាក់ បានឲ្យដឹងទៀតថា នៅពេលដែលកម្មករបានដឹង ពីការព្យួរការងារតំណាងសហជីពទាំង ៧នាក់ខាងលើ កម្មករកម្មការិនីទាំងអស់ បាននាំគ្នាធ្វើកូដកម្ម ដើម្បីទាមទារឲ្យតំណាងរបស់ខ្លួនបានចូលធ្វើការវិញ ។
លោក ហ្វា សាលី អគ្គលេខាធិការសម្ព័ន្ធសហជីពចលនាកម្មករ បានឲ្យដឹងថា សហជីពរបស់លោក បានអំពាវនាវឲ្យកម្មករ កម្មការិនីទាំងអស់ចូលធ្វើការវិញ ហើយកុំជឿតាមការញុះញង់របស់សហជីព សេរីកម្មករ ព្រោះវាធ្វើឲ្យបាត់ផលប្រយោជន៍បងប្អូនទាំងអស់គ្នា ។ ចំពោះការព្យួរការងារមនុស្សទាំង ៧នាក់ខាងលើ គឺខាងរោងចក្រយោងតាមមាត្រា ៧១ និង ៧២ នៃច្បាប់ការងារ ព្រោះកន្លងមកពួកគាត់មិនបានបំពេញការងារ ជាអ្នកដឹកនាំមិនស្តាំនាយករោងចក្រ និងប្រធានរដ្ឋបាល ហើយអាងអីគំរាមទៅ Buyer ( អ្នកបញ្ហាទិញ ) ធ្វើឲ្យការដាក់ទុនវិនិយោគរបស់វិនិយោគិនថយចុះ កម្មករបាត់ឱកាសធ្វើការងារ ។
ទោះបីយ៉ាងណាការធ្វើកូដកម្មរវាងសហជីពទាំង ២ក្រុម មិនមានអំពើហិង្សាឡើយ ប៉ុន្តែការជេរដៀលគ្នាទៅវិញទៅមក ក៏អាចជាឈ្នួនមួយមិនល្អ ហើយមានកិច្ចអន្តរាគមន៍ពីអង្គការពាក់ព័ន្ធ ជាពិសេសសង្គមកិច្ច ប៉ូលិស ប៉េអឹម ត្រូវជួយសម្របសម្រួល កិច្ចការនេះឲ្យបានល្អ ។
ប៉ូលិសមួយរូបបានឲ្យដឹងថា ក្រសួងការងារ នឹងកោះហៅសហជីពទាំង២ នឹងលោកថៅកែរោងចក្រ ជួបចរចាគ្នានៅទីស្តីការក្រសួង នាព្រឹកថ្ងៃទី ១៥ មិថុនានេះ ៕(ដកស្រង់ចេញពីគេហទំព័រ ខេមបូឌាអេចបេ្រសញូស៍)
សមាសភាពក្រុមប្រឹក្សាជាតិប្រឆាំងអំពើពុករលួយ ចេញជារូបរាងហើយ
ភ្នំពេញ: ក្រុមប្រឹក្សាជាតិប្រឆាំងអំពើពុករលួយ បានបើកកិច្ចប្រជុំជាលើកដំបូង ដើម្បីបោះឆ្នោតជ្រើសរើសប្រធាន និងអនុប្រធានស្ថាប័នកំពូលនេះ នៅទីស្តីការគណៈរដ្ឋមន្ត្រី នៅព្រឹកម៉ោង ៩ ថ្ងៃអង្គារ៍ ទី១៥ ខែមិថុនានេះ ។
នៅពេលបើកកិច្ចប្រជុំ លោក ហេងវង្ស ប៊ុនឆាត សមាជិកក្រុមប្រឹក្សាជាតិប្រឆាំងអំពើពុករលួយ ដែលមានវ័យចាស់ជាងគេ បានដឹកនាំអង្គប្រជុំ និងបានប្រកាសពីសមាសភាពក្រុមប្រឹក្សាជាតិប្រឆាំងអំពើពុករលួយ ទាំង ១១ រូប ដែលរួមមាន៖
១- លោក គុយ សុផល តែងតាំងដោយ ព្រះមហាក្សត្រ
២- លោក ប្រាក់ សុខ តែងតាំងដោយ ព្រឹទ្ធសភា
៣- លោក តុប សំ តែងតាំងដោយ រដ្ឋសភា
៤- លោក ឱម យិនទៀង ប្រធានអង្គភាពប្រឆាំងអំពើពុករលួយ
៥- លោក កែវ រ៉េមី តែងតាំងដោយ គណៈកម្មាធិការសិទ្ធិមនុស្សកម្ពុជា
៦- លោក ជីវ កេង តែងតាំងដោយ ឧត្តមក្រុមប្រឹក្សានៃអង្គចៅក្រម
៧- លោក អ៊ុត ឈន តែងតាំងដោយ អាជ្ញាធរសវនកម្មជាតិ
៨- លោកស្រី សោម គឹមសួរ ជ្រើសតាំងដោយ ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច
៩- លោក ស៊ុយ ម៉ុងលាង ក្រុមប្រឹក្សាកំណែទម្រង់ច្បាប់ និងប្រព័ន្ធយុត្តិធម៌
១០- លោក ច័ន្ទ តានី តែងតាំងដោយ រដ្ឋាភិបាល
១១- លោក ហេងវង្ស ប៊ុនឆាត តែងតាំងដោយ ក្រុមប្រឹក្សាអ្នកច្បាប់
សមាសភាពក្រុមប្រឹក្សាជាតិប្រឆាំងអំពើពុករលួយទាំង ១១ រូបនេះ ត្រូវធ្វើការបោះឆ្នោតជាសម្ងាត់ ដើម្បីជ្រើសរើសប្រធាន និងអនុប្រធានស្ថាប័នកំពូលនេះ ។ ប៉ុន្តែក្រុមអ្នកកាសែត មិនត្រូវបានគេអនុញ្ញាតឲ្យសង្កេតការណ៍ ចំពោះការបោះឆ្នោតនោះទេ ៕
(ដកស្រង់ចេញពីគេហទំព័រ ខេមបូឌាអេចបេ្រសញូស៍)
នៅពេលបើកកិច្ចប្រជុំ លោក ហេងវង្ស ប៊ុនឆាត សមាជិកក្រុមប្រឹក្សាជាតិប្រឆាំងអំពើពុករលួយ ដែលមានវ័យចាស់ជាងគេ បានដឹកនាំអង្គប្រជុំ និងបានប្រកាសពីសមាសភាពក្រុមប្រឹក្សាជាតិប្រឆាំងអំពើពុករលួយ ទាំង ១១ រូប ដែលរួមមាន៖
១- លោក គុយ សុផល តែងតាំងដោយ ព្រះមហាក្សត្រ
២- លោក ប្រាក់ សុខ តែងតាំងដោយ ព្រឹទ្ធសភា
៣- លោក តុប សំ តែងតាំងដោយ រដ្ឋសភា
៤- លោក ឱម យិនទៀង ប្រធានអង្គភាពប្រឆាំងអំពើពុករលួយ
៥- លោក កែវ រ៉េមី តែងតាំងដោយ គណៈកម្មាធិការសិទ្ធិមនុស្សកម្ពុជា
៦- លោក ជីវ កេង តែងតាំងដោយ ឧត្តមក្រុមប្រឹក្សានៃអង្គចៅក្រម
៧- លោក អ៊ុត ឈន តែងតាំងដោយ អាជ្ញាធរសវនកម្មជាតិ
៨- លោកស្រី សោម គឹមសួរ ជ្រើសតាំងដោយ ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច
៩- លោក ស៊ុយ ម៉ុងលាង ក្រុមប្រឹក្សាកំណែទម្រង់ច្បាប់ និងប្រព័ន្ធយុត្តិធម៌
១០- លោក ច័ន្ទ តានី តែងតាំងដោយ រដ្ឋាភិបាល
១១- លោក ហេងវង្ស ប៊ុនឆាត តែងតាំងដោយ ក្រុមប្រឹក្សាអ្នកច្បាប់
សមាសភាពក្រុមប្រឹក្សាជាតិប្រឆាំងអំពើពុករលួយទាំង ១១ រូបនេះ ត្រូវធ្វើការបោះឆ្នោតជាសម្ងាត់ ដើម្បីជ្រើសរើសប្រធាន និងអនុប្រធានស្ថាប័នកំពូលនេះ ។ ប៉ុន្តែក្រុមអ្នកកាសែត មិនត្រូវបានគេអនុញ្ញាតឲ្យសង្កេតការណ៍ ចំពោះការបោះឆ្នោតនោះទេ ៕
(ដកស្រង់ចេញពីគេហទំព័រ ខេមបូឌាអេចបេ្រសញូស៍)
Subscribe to:
Posts (Atom)