ក្រសួងកិច្ចការសាធារណៈនៃរដ្ឋ GUERRERO របស់ម៉ិចស៊ិករាយការណ៍កាលពីថ្ងៃទី៧ មិថុនា ថា សរុបសាកសពមនុស្ស៥៥ នាក់ត្រូវបានគេយកចេញពីរណ្ដៅរួមលួចលាក់មួយក្នុងរដ្ឋនេះ ស្ថិតនៅភាគខាងត្បូងប្រទេសរាតត្បាតដោយសង្គ្រាមរបស់ពួកស្ដេចរត់ពន្ធគ្រឿងញៀន ។ រណ្ដៅរួមនេះត្រូវបានរកឃើញនៅមាត់អណ្ដូងរ៉ែមួយដែលមានជំរៅជាង១០០ម៉ែត្ររកឃើញកាលពី១សបា្ដហ៍មុនក្នុងភូមិទេសចរណ៍តាក់កូ ។ អ្នកទទួលខុសត្រូវរូបនេះបន្ដថា គិតមកដល់យប់ថ្ងៃទី៥ មិថុនា ចំនួនសាកសពសរុបដែលទាញយកចេញពីរណ្ដៅនេះមាន៥៥នាក់ ហើយការងាររុករកត្រូវបានបញ្ចប់ ។ ក្នុងចំណោមសាកសពមនុស្សទាំង៥៥នាក់ មាន សាកសពតែ៤ប៉ុណ្ណោះ អាចកំណត់ដឹងអត្ដសញាណ ក្នុងនោះរួមមានសាកសពរបស់នាយកពន្ធនាគារមួយផង ។ សាកសពមនុស្ស ទាំងនេះអាចត្រូវគេនាំយកទៅទំលាក់ក្នុងរណ្ដៅមួយរយៈពេល៦ខែចុងក្រោយនេះ ។រដ្ឋ GUERRERO នៅជាប់មហាសមុទ្រប៉ាស៊ីហ្វិក ប្រើជាកន្លែងឆ្លងកាត់កូកាអ៊ីន និងហេរ៉ូអ៊ីន នាំចូលពីអាមេរិកខាងត្បូងបន្ទាប់ មកនាំចេញទៅកាន់សហរដ្ឋអាមេរិកជាប្រទេសប្រើប្រាស់គ្រឿងញៀនធំជាងគេលើពិភពលោក ។ សង្គ្រាមរវាងពួកក្រុមស្ដេចរត់ពន្ធគ្រឿងញៀន បណ្ដាលឱ្យមនុស្សស្លាប់ជិត២៣.០០០នាក់ ហើយនៅម៉ិចស៊ិកចាប់តាំងពីការឡើងកាន់អំណាចរបស់លោក ប្រធានាធិបតីហ្វឺលីប កាល់ដឺរ៉ូន ពីដំណាច់ឆ្នាំ២០០៦មក ទោះបីជាមានការដាក់ពង្រាយកងទាហានដល់ទៅជាង៥០.០០០នាក់ក្នុង ប្រទេសក្ដី ៕
(ដកស្រង់ចេញពីគេហទំព័រ កាសែតកោះសន្តិភាព)
No comments:
Post a Comment