លទ្ធផលស្រាវជ្រាវនៃកិច្ចប្រជុំសេដ្ឋកិច្ចពិភពលោក(WEF) រកឃើញថា ប្រទេសសិង្ហបុរីនៅតែគ្រប់គ្រងតំណែងជាប្រទេស ដែលគួរឱ្យចង់ប្រកបមុខជំនួញបំផុតនៅលើពិភពលោកតាមរយៈការរៀបចំលំដាប់ថ្នាក់សរុបចំនួន១២៥ប្រទេស ដោយស្ទាបស្ទង់លើកត្ដាចំនួន៤ រួមមានការបើកទីផ្សារ ការគ្រប់គ្រងច្រកចេញចូលតាមព្រំដែន គំរោងសាងសង់ផ្នែកគមនាគមន៍ និងស្ថានភាពបរិ ស្ថានទូទៅក្នុងការធ្វើជំនួញ។ ចំណែកប្រទេសថៃត្រូវបានចាត់នៅលំដាប់ថ្នាក់ទី ៦០ រំកិលធ្លាក់កាលពីឆ្នាំមុនដែលស្ថិតក្នុងលំដាប់ទី៥០ ។ដោយឡែកការស្រាវជ្រាវរបស់ក្រុមហ៊ុនទីប្រឹក្សាភាពប្រថុយប្រថានផ្នែកនយោបាយ និងសេដ្ឋកិច្ច (PERC) ដោយយោងលើប្រទេសទាំង១២ និងដែនដីសំខាន់របស់អាស៊ី ឃើញថា ប្រទេសឥណ្ឌា ឥណ្ឌូណេស៊ី និងហ្វ៉ី លីពីន គឺមានប្រព័ន្ធផ្នែកស្ថាប័នរដ្ឋគ្មានប្រសិទ្ធភាពច្រើនបំផុតនៅអាស៊ី ព្រោះមាន ស្ថានភាពស្មុគស្មាញ និងបង្កើតផលវិបាកដល់ប្រជាជន រួមទាំងរារាំងលើការវិនិយោគទុនបរទេស ។ ក្រុមហ៊ុន PERC បានកំណត់ការស្ទាបស្ទង់ពីពិន្ទុ១ដល់១០ ឬជាការស្ទាបស្ទង់ចាប់ពីប្រទេសដែលមានលក្ខណៈគ្រប់គ្រងល្អ រហូតដល់ប្រព័ន្ធគ្រប់គ្រងដ៏យ៉ាប់យ៉ឺននៅអាស៊ី ក្នុងនោះរួមមានប្រទេសសិង្ហបុរីស្ថិតនៅលំដាប់ទី១ ដែលមានប្រព័ន្ធគ្រប់គ្រងរដ្ឋបាលល្អបំផុតនៅអាស៊ី ដោយមាន២,៥៣ ពិន្ទុ និងលំដាប់ទី២នៅអាស៊ី គឺហុងកុងមាន ៣,៤៩ពិន្ទុ និងស្ថិតនៅលំដាប់ទី៣នៅលើពិភពលោក។
ចំណែកប្រទេសដែលមានការគ្រប់គ្រងរដ្ឋបាលយ៉ាប់យ៉ឺនបំផុតនៅតំបន់អាស៊ី ដោយគិតតាមលំដាប់ពិន្ទុពីខ្ពស់ទៅទាប គឺប្រទេសឥណ្ឌាជាប្រទេសដែលមានប្រព័ន្ធគ្រប់គ្រងលើមុខជំនួញទាបបំផុតមាន៩,៤១ពិន្ទុ ខណៈ ពេលលំដាប់ទី២ជាប្រទេសឥណ្ឌូណេស៊ី មាន ៨,៥៩ពិន្ទុ លំដាប់ទី៣ គឺហ្វ៉ីលីពីនមាន ៨,៣៧ពិន្ទុ ។ សំរាប់លំដាប់ទី៤ គឺវៀតណាម មាន៨,១៣ពិន្ទុ លំដាប់ទី៥ ប្រទេសចិនមាន ៧,៩៣ពិន្ទុ និងទី៦ គឺប្រទេសម៉ាឡេស៊ីមាន ៦,៩ពិន្ទុ។
ក្រៅពីនេះតៃវ៉ាន់ជាដែនដីមួយស្ថិតក្នុងលំដាប់ទី៧មាន៦,៦០ពិន្ទុ លំដាប់ទី៨ គឺ ប្រទេសជប៉ុនមាន៦,៥៧ពិន្ទុ លំដាប់ទី៩ កូរ៉េខាងត្បូងមាន៦,១៣ពិន្ទុ និងលំដាប់ទី១០ គឺ ប្រទេសថៃមាន៥,៥៣ពិន្ទុ និងស្ថិតនៅលំដាប់ទី៦០នៅលើពិភពលោក ៕
(ដកស្រង់ចេញពីគេហទំព័រ កាសែតកោះសន្តិភាព)
No comments:
Post a Comment