អាជ្ញាធរក្នុងតំបន់ “លួងណាមថា” ភាគខាងជើងប្រទេសឡាវ បានអនុម័តដីសម្បទានប្រហែល១០.០០០ហិកតាឱ្យក្រុមហ៊ុនចិនសំរាប់ធ្វើចំការកៅស៊ូ ដោយមានប្រាក់វិនិ យោគជាង៥០លានដុល្លារ ដែលឆ្លុះបញ្ចាំងឱ្យឃើញថា ជាការពង្រីកសកម្មភាពរបស់ចិនក្នុងការអភិវឌ្ឍន៍សេដ្ឋកិច្ចរបស់ឡាវ ។ការចុះហត្ថលេខាដែលបានធ្វើឡើងកាលពីថ្ងៃទី២៥ ឧសភា កន្លងមក គឺមានអភិបាល ក្រុងលួងណាមថា លោកភីម ម៉ាសន លឿង ខាំម៉ា និងតំណាងក្រសួងការពារជាតិចូលរួមជាសាក្សី ។ នេះបើតាមការឱ្យដឹងរបស់ទីភ្នាក់ងារព័ត៌មានឡាវ ។ ទោះបីជាយ៉ាងណា ទីភ្នាក់ងារព័ត៌មានឡាវមិនបានផ្សព្វផ្សាយព័ត៌មានលំអិតថា តើកិច្ចសន្យាវិនិយោគទុនអនុញាតឱ្យប្រើប្រាស់ដីធ្លីក្នុងរូបភាពណាមួយសំរាប់ការវិនិយោគទុនដាំកៅស៊ូ ដោយក្រុមហ៊ុនរបស់ចិន ឬបែងចែកជាកិច្ចសន្យាកសិផល ដែលដំណើរការរួមជាមួយកសិកម្មក្នុងតំបន់ ដែលជារូបភាពពេញនិយមក្នុងរយៈពេលចុងក្រោយនេះ ព្រោះមានដីធ្លីនៅសល់ដ៏តិចតួច ។
នៅមិនទាន់មានតួលេខជាផ្លូវការនៅឡើយទេ ប៉ុន្ដែក្នុងរយៈពេលជាច្រើនឆ្នាំកន្លង ទៅអ្នកវិនិយោគទុនពីប្រទេសចិនបានចូលទៅធ្វើចំការកៅស៊ូនៅតំបន់ភាគខាងជើងរបស់ឡាវលើផ្ទៃដី ជាច្រើនម៉ឺនហិកតាសំរាប់ផលិតជ័រក្រែបបញ្ជូនទៅទីផ្សារក្នុងប្រទេសចិន ដែលក្នុងមួយឆ្នាំៗមានតំរូវការកើនឡើងឥតឈប់ឈរ ។ ក្នុងរយៈពេលជាច្រើនឆ្នាំកន្លងមក អ្នកវិនិយោគទុនរបស់ចិនបានចូលទៅប្រកបមុខជំនួញជាច្រើនយ៉ាងនៅភាគខាងជើងរបស់ឡាវមានទាំងផ្នែកកសិកម្មសាងសង់មជ្ឈមណ្ឌលទេសចរណ៍ កាស៊ីណូ មជ្ឈមណ្ឌលពាណិជ្ជកម្ម អណ្ដូងរ៉ែ និងបង្កើតទំនប់វារីអគ្គិសនី ខណៈដែលគំរោងការភាគច្រើនប្រើប្រាស់ដីសម្បទានជាច្រើនពាន់ហិកតា ។
បច្ចុប្បន្នផ្នែកឯកជនបានពង្រីកការវិនិយោគទុននៅក្នុងប្រទេសឡាវ រីឯរដ្ឋាភិបាលចិនក៏បានបង្កើនកិច្ចសហប្រតិបត្ដិការជួយឧបត្ថម្ភដល់រដ្ឋាភិបាលឡាវ រួមទាំងជួយសាងសង់ផ្លូវជាតិជាច្រើនខ្សែ សង់ស្ពាន និងជួយឡាវធ្វើការអភិវឌ្ឍន៍ព្រលានយន្ដហោះយ៉ាងតិចចំនួន៣កន្លែង នៅភាគខាងជើងរបស់ឡាវ ក្នុងរយៈពេល៥ឆ្នាំខាងមុខ ។
កាលពីពេលថ្មីៗកន្លងមក ក្រុមហ៊ុនសំណង់របស់ចិនបានចុះហត្ថលេខាលើកិច្ចសន្យាសាងសង់ស្ពានឆ្លងកាត់ទន្លេមេគង្គនៅក្រុងប៉ាកប៊ែង តំបន់ឧត្ដមសៃ ដែលជាចំណុចតភ្ជាប់ការដឹកជញ្ជូនផ្លូវគោករវាងថៃ ឡាវ ចិន និងវៀតណាម រួមទាំងការជួយដល់ប្រទេសឡាវធ្វើការស្រាវជ្រាវ និងត្រៀមកសាងផ្លូវជាតិមួយខ្សែសំរាប់បើកច្រកឆ្ពោះទៅព្រំដែនវៀតណាមផងដែរ ៕
No comments:
Post a Comment