តាមពត៌មានក្នុងស្រុកដកស្រង់ចេញពីក្រុមមន្ត្រីក្រសួងរៀបចំដែនដី នគរូបនីយកម្ម និងសំណង់ រាយការណ៍មកឲ្យដឹងថា កម្ពុជាបានចាប់ផ្ដើមអនុវត្តលើយុទ្ធសាស្ត្រមេរបស់ខ្លួន ដើម្បីទាក់ទាញការអភិវឌ្ឍន៍ខេត្តតំបន់ឆ្នេរទាំង៤ ក្នុង រយៈពេល ២០ឆ្នាំខាងមុខទៀត។តាមកាសែតភ្នំពេញប៉ុស្តិ៍ ដកស្រង់សំដីរដ្ឋមន្ត្រីក្រសួងរៀបចំដែនដី លោក អ៊ឹម ឈុនលីម នៅក្នុងសន្និសីទមួយទាក់ទងនឹងគម្រោងនេះ កាលពីថ្ងៃព្រហស្បត្តិ៍ ដោយនិយាយថា "នេះជាគម្រោងការដ៏ល្អមួយ ហើយជាមធ្យោបាយមួយ ក្នុងការអភិវឌ្ឍន៍កម្ពុជានាពេលអនាគត"។
រដ្ឋមន្ត្រី អ៊ឹម ឈុនលីម ហៅខេត្តព្រះសីហនុថា ជាតំបន់ក្បាលនាគ លោកបាននិយាយថា គម្រោងនេះផ្ដល់លទ្ធភាពដល់ការអភិវឌ្ឍន៍នៅខេត្តព្រះសីហនុ កំពត កែប និងខេត្តកោះកុង ក្នុងទិសដៅបង្កើតសកម្មភាពសេដ្ឋកិច្ច និងការងារ។
រដ្ឋមន្ត្រី អ៊ឹម ឈុនលីម និយាយនៅក្នុងសន្និសីទថា "យើងកំពុងធានាឲ្យមានតុល្យភាពរវាង ការការពារបរិស្ថាននៅតំបន់ឆ្នេរ ជាមួយនឹង ការទាក់ទាញអ្នកវិនិយោគទាំងក្នុងស្រុក និងនៅបរទេស"។
តាមសំដីរបស់ លោក ផេន សុផល ប្រធាននាយកដ្ឋាននៃក្រសួងរៀបចំដែនដី នគរូបនីយកម្ម និងសំណង់ បាននិយាយថា យុទ្ធសាស្ត្រនេះ នឹងផ្ដោតទៅលើការទាក់ទាញវិនិយោគិនក្នុងស្រុក និងបរទេស នៅក្នុងតំបន់ ហើយត្រួតពិនិត្យលើការពង្រឹងឧស្សាហកម្មនាំចេញ។
លោក ផេន សុផល និយាយក្រៅផ្លូវការណ៍នៅក្នុងសន្និសីទស្តីពីសេចក្ដីព្រាងយុទ្ធសាស្ត្រចុងក្រោយនៃ (ជាតិធ្វើសមាហ័រណតំបន់ឆ្នេរ) ថា "រដ្ឋាភិបាលប្រកាន់ខ្ជាប់នូវការអភិវឌ្ឍន៍ក្នុងតំបន់ឆ្នេរដើម្បីទាក់ទាញវិនិយោគិន"។ លោកបានបន្ថែមទៀតថា គម្រោងនេះត្រូវបានរំពឹងទុកថា នឹងដំណើរការដល់ឆ្នាំ ២០៣០។
គម្រោងនេះឲ្យឈ្មោះថា ការសិក្សាលើយុទ្ធសាស្ត្រជាតិធ្វើសមាហ័រណតំបន់ឆ្នេរ និងគម្រោងមេលើការអភិវឌ្ឍន៍ទ្រទ្រង់ខេត្តសីហនុ ដោយផ្តោតទៅលើ ការពង្រឹងហេដ្ឋារចនាសម្ព័ន្ធ និងតំបន់សេដ្ឋកិច្ចពិសេស បំរើការនៅកំពង់ផែសីហនុ។
លោក ផេន សុផល បានបន្តទៀតថា "យើងផ្ដោតទៅលើខេត្តព្រះសីហនុ ដោយសារតែខេត្តនេះមានសក្តានុពលកើនឡើងយ៉ាងឆាប់រហ័ស ផ្អែកលើកំពង់ផែអន្តរជាតិនៅក្បែរនេះជាសំរាប់វិស័យឧស្សាហកម្ម កសិកម្ម និងសេវាកម្ម"៕
(ដកស្រង់ចេញពីគេហទំព័រ នគរវត្ត)
No comments:
Post a Comment