ក្រុងប៉ោយប៉ែត ៖ កម្មករខ្មែរចំនួន១៥ នាក់ដែលអះអាងថាបានចូលទៅទឹកដីសៀម ដោយស្របច្បាប់មានទាំងប័ណ្ណអន្ដោប្រវេសន៍ចេញដោយអាជ្ញាធរសៀម (immigration card) ហើយថែមទាំងទិញសំបុត្រ ១០បាត សំរាប់ការចេញចូលតាមច្រកទ្វារអន្ដរជាតិប៉ោយប៉ែតទៀត ផ្ទុយទៅវិញ បែរជាសមត្ថកិច្ចសៀមចាប់ដាក់គុកអស់៤០ថ្ងៃ គួរឱ្យឈឺចាប់គឺចាប់តាំងពីថ្ងៃទី៣០ មេសា ឆ្នាំ២០១០ មកម្ល៉េះ ។នៅរសៀលថ្ងៃទី៨ មិថុនា ឆ្នាំ២០១០ ភាគីសៀមបានបញ្ជូនកម្មករខ្មែរ១៥នាក់ នោះមកឱ្យសមត្ថកិច្ចកម្ពុជាវិញហើយ ក្រោយពីមានការជួយអន្ដរាគមន៍យ៉ាងយកចិត្ដទុកដាក់ពីមន្ដ្រីការិយាល័យទំនាក់ទំនង ព្រំដែនកម្ពុជា-ថៃ ពិសេសកុងស៊ុលខ្មែរប្រចាំ ខេត្ដស្រះកែវ ។ កម្មកររងគ្រោះដែលសៀម ចាប់ដាក់គុកទាំង១៥នាក់ រួមមាន ១-ឈ្មោះ ជឿង តូណា អាយុ២០ឆ្នាំ ២-ឈ្មោះខាន់ សុខា អាយុ៣២ឆ្នាំ ៣-ឈ្មោះចាប សារ៉េន អាយុ៥៣ឆ្នាំ ៤-ឈ្មោះកែន សំឡី អាយុ៦៣ ឆ្នាំ ៥-ឈ្មោះប៊ុន សាវ៉ាត អាយុ៥២ឆ្នាំ ៦-ឈ្មោះកៅ ៧-ឈ្មោះម៉េត ៨-ឈ្មោះឡេក ៩-ឈ្មោះសួង សៀម ១០-ឈ្មោះម៉ុល ១១-ឈ្មោះង៉ុយ ១២-ឈ្មោះរ៉ាំង ១៣-ឈ្មោះវិន ១៤-ឈ្មោះប៉ូឡូ និង១៥-ឈ្មោះសិទ្ធ ។
កម្មករទាំងនេះមានទីលំនៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ។ ក្រុមអ្នកសង្កេតការណ៍គិតថាកម្មករ ឬ អ្នកទេសចរក្ដីមានលិខិតស្នាមគ្រប់គ្រាន់ទៅហើយ នៅតែអាជ្ញាធរសៀមចាប់គេដាក់គុកទៀត តើអនាគតភ្ញៀវទេសចររបស់ប្រទេស នេះនឹងទៅជាយ៉ាងណា? ការចាប់ពលករខ្មែរដែលមានលិខិតស្នាមឆ្លងដែនគ្រប់គ្រាន់ គឺជា ទឡ្ហីករណ៍បញ្ជាក់ថានឹងឈានចាប់ភ្ញៀវទេសចរដទៃទៀតដាក់គុកទាំងអស់... ប្រទេសសៀមគួរឱ្យខ្លាចណាស់ ៕(ដកស្រង់ចេញពីគេហទំព័រ កាសែតកោះសន្តិភាព)
No comments:
Post a Comment