ភ្នំពេញ: សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានណែនាំឲ្យបញ្ឈប់ការយកភាស៊ីសណ្តាប់ធ្នាប់របស់ក្រុមហ៊ុនរ័ត្ន សែនសុភាព លើការលក់ដូរទាំងក្នុង និងក្រៅផ្សារនានាក្នុងរាជធានីភ្នំពេញ លើកលែងបង្គន់អនាម័យ និងចំណតយានយន្ត ។
នៅក្នុងកិច្ចប្រជុំគណៈរដ្ឋមន្ត្រីកាលពីព្រឹកថ្ងៃទី៤ ខែមិថុនា ឆ្នាំ២០១០ សម្តេចតេជោនាយករដ្ឋមន្ត្រីហ៊ុន សែន បានដាក់បទបញ្ជាឲ្យក្រសួងសេដ្ឋកិច្ច និងហិរញ្ញវត្ថុ សហការជាមួយសាលារាជធានីភ្នំពេញ ពិនិត្យកែសម្រួលសៀវភៅបន្ទុករបស់ក្រុមហ៊ុន រ័ត្ន សែនសុភាព ដោយបញ្ឈប់មិនឲ្យក្រុមហ៊ុននេះ ធ្វើសកម្មភាពយកភាស៊ីសណ្តាប់ធ្នាប់លើការលក់ដូរទាំងក្នុង និងក្រៅផ្សារនានាក្នុងរាជធានីភ្នំពេញ លើកលែងបង្គន់អនាម័យ និងចំណតយានយន្ត ។
គួររំលឹកដែលថា កន្លងមកក្រុមហ៊ុន រ័ត្ន សែនសុភាព បានធ្វើសកម្មភាពយកភាស៊ីនៅគ្រប់កនែ្លងលក់ដូរ ទាំងអស់ក្នុងរាជធានី តាំងពីតាមមុខផ្ទះ ចិញ្ចើមថ្នល់ រាប់តាំងពីអ្នកលក់ដូរតូចតាច ដែលធ្វើឲ្យមានបាតុភាពមិនពេញចិត្ត ពីសំណាក់អាជីវករ និងអ្នកលក់ដូរតូចតាច ចំពោះសកម្មភាពរបស់ក្រុមហ៊ុននេះ រហូតមានការតវ៉ាទៅសម្តេចតេជោ ហ៊ុន សែន កាលពីថ្ងៃទី៣១ ខែឧសភា ទៀតផង ។ សកម្មភាពរបស់ក្រុមហ៊ុននេះ ក៏មានការជាន់គ្នាច្រើនទៅនិងអ្នកម៉ៅការភាស៊ីតាមផ្សារ និងប៉ូលិសសណ្តាប់ធ្នាប់ ដែលដើរយកលុយពីផ្ទះលក់ដូរនៅតាមសង្កាត់ខណ្ឌ ធ្វើឲ្យអ្នកលក់ដូរត្រូវបង់ភាស៊ី ឲ្យសមត្តកិច្ចមិនតិចជាង ៥ ស្ថាប័នតែក្នុង ១ ថ្ងៃៗ ៕
(ដកស្រង់ចេញពីគេហទំព័រខេមបូឌាអេចបេ្រសញូស៏)
No comments:
Post a Comment