ភ្នំពេញ: កិច្ចប្រជុំពេញអង្គគណៈរដ្ឋមន្ត្រីថ្ងៃទី៤ ខែឧសភា ដែលប្រព្រឹត្តទៅក្រោមអធិបតីភាពសម្តេចតេជោ ហ៊ុន សែន បានពិនិត្យទៅលើខ្លឹមសារអនុក្រឹតសំខាន់ៗមួយចំនួន ។
កិច្ចប្រជុំក៏បានលើកយកសេចក្តីព្រាងអនុក្រឹត្យស្តីពីការបង្កើតប្រៃសណីយ៍កម្ពុជា ជាសហគ្រាសសាធារណៈ ដែលអនុក្រឹត្យនេះ មានគោលបំណង ធ្វើកំណែទំរង់ប្រព័ន្ធគ្រប់គ្រងប្រៃសណីយ៍បច្ចុប្បន្ន ឲ្យទៅជាសហគ្រាសសាធារណៈស្រប តាមទិសដៅគម្រោងផែនការអភិវឌ្ឍន៍ជាតិ ២០០៦.២០១០ ដែលជាផ្នែកមួយនៃគម្រោង ផែនការរបស់ប្រៃសណីយ៍ ទូរគមនាគមន៍ ។ ធ្វើទំនើបភាវូបនីយកម្ម វិស័យប្រៃសណីយ៍ ដោយប្រើប្រាស់ប្រព័ន្ធព័ត៌មានវិទ្យា សម្រាប់តាមដានបញ្ញើប្រៃសណីយ៍ និង ពង្រីក បណ្តាញប្រៃសណីយ៍ ដល់ទីជនបទដាច់ស្រយ៉ាល ដើម្បីបំរើប្រជាពលរដ្ឋ ឲ្យកាន់តែមានប្រសិទ្ធភាព ។
គណៈរដ្ឋមន្ត្រីក៏បានអនុម័តលើសេចក្តីព្រាងអនុក្រឹត្យ ស្តីពីការរៀបចំសមាសភាព និង ការប្រព្រឹត្តទៅនៃក្រុមប្រឹក្សាសកម្មភាពជនពិការ ដើម្បីធ្វើជាយន្តការពិគ្រោះយោបល់ ពហុភាគីរវាង ក្រសួង ស្ថាប័នរដ្ឋ តំណាងអង្គការជនពិការ តំណាងអង្គការមិនមែន រដ្ឋាភិបាល ដែលមានកម្មវិធីជួយជនពិការក្នុងការធានា និង ជម្រុញការអនុវត្តច្បាប់ស្តីពី កិច្ចការពារ និង លើកកំពស់សិទ្ធជនពិការ ដែលជាជនងាយរងគ្រោះ ហើយភាគច្រើនក្រីក្រ លំបាក ។
អង្គប្រជុំក៏បានឆ្លងសេចក្តីព្រាងអនុក្រឹត្យ ស្តីពីការអនុវត្តច្បាប់ស្តីពី ជីវសុវត្តិភាព ដែលរៀបចំឡើងដោយក្រសួងបរិស្ថាន ក្នុងគោលបំណង ដើម្បីកំណត់អំពី យន្តការ និង និតិវិធី អនុវត្តច្បាប់ស្តីពីជីវសុវត្តិភាព ក្នុងនោះរួមមាននិតិវិធីស្តីពីការគ្រប់គ្រង និង ត្រួតពិនិត្យចលនាឆ្លងដែន ការអភិរក្ស ការលើកដាក់ ការផ្ទេរ ការប្រើប្រាស់ ការស្តុកទុក និង ការបញ្ចេញសារពាង្គកាយកែច្នៃរស់ ដែលបង្កើតឡើងដោយជីវបច្ចេកវិទ្យាទំនើប អាច នាំមកនូវផលប៉ះពាល់អវិជ្ជមាន ដល់ការអភិរក្ស និង ការប្រើប្រាស់ដោយនិរន្តភាព នូវធនធានជីវចំរុះ ក្នុងព្រះរាជាណាចក្រកម្ពុជា ។
អនុក្រឹត្យនេះក្នុងគោលបំណងទប់ស្កាត់ផលប៉ះពាល់អវិជ្ជមាន លើការអភិរក្សជីវចំរុះ បរិស្ថាន និង សុខភាពមនុស្ស ។ ធានាប្រសិទ្ធភាពនៃការអភិរក្ស និងការប្រើប្រាស់ជីវចំរុះ ដោយនិរន្តរភាព ។ លើកកំពស់ការយល់ដឹងអំពី ជីវបច្ចេកវិទ្យាទំនើប និង ទប់ស្កាត់ហានិភ័យ បណ្តាលមកពីសារពាង្គកាយកែច្នៃរស់ ការពារបរិស្ថាន និង សុខភាពមនុស្ស ៕
(ដកស្រង់ចេញពីគេហទំព័រ ខេមបូឌាអេចបេ្រសញូស៏)
No comments:
Post a Comment