ខេត្ដកណ្ដាល ៖ ស្ពានមិត្ដភាពកម្ពុជា-ចិនឆ្លងកាត់ទន្លេសាបព្រែកក្ដាម និងការដ្ឋានស្ដារឡើងវិញផ្លូវជាតិលេខ៦១ ពីគល់ស្ពានព្រែកក្ដាមត្រើយខាងកើតដល់ផ្លូវជាតិលេខ៦A ប្រវែង១៦គីឡូម៉ែត្រ នៅព្រឹកថ្ងៃទី៣១ ឧសភា ឆ្នាំ២០១០ បានប្រារឰពិធីសម្ពោធបើកឱ្យប្រើប្រាស់ជាផ្លូវការ និងបើកការដ្ឋានស្ដារឡើងវិញ ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងមានការអញ្ជើញចូលរួមជាកិត្ដិយសផង ដែរពីលោកផាន គងស៊ា (PAN GUANG XUE) ឯកអគ្គរដ្ឋទូតចិនប្រចាំនៅកម្ពុជា។ ពិធីសម្ពោធ និងបើកការដ្ឋាននេះបានប្រារឰធ្វើឡើងនៅស្រុកពញាឮ ខេត្ដកណ្ដាល ។ លោកត្រាំ អ៊ីវតឹក រដ្ឋមន្ដ្រីក្រសួងសាធារណការ និងដឹកជញ្ជូនបានឱ្យដឹងថា ស្ពានព្រែកក្ដាមដែលសម្ដេចតេជោនាយករដ្ឋមន្ដ្រីអញ្ជើញសម្ពោធបើកឱ្យប្រើប្រាស់ជាផ្លូវការនៅពេលនេះមានបណ្ដោយប្រវែង៩៨១ម៉ែត្រ ទទឹងប្រវែង១៣,៥ម៉ែត្រ មានប្រឡោះស្ពានសរុបចំនួន១៩ និងផ្លូវភ្ជាប់ក្បាលស្ពានប្រវែងសរុប៤១៩ម៉ែត្រ សាងសង់ដោយក្រុមហ៊ុនសៀងហៃ ត្រួតពិនិត្យ បច្ចេកទេសដោយក្រុមហ៊ុន Guangzhou Wanan Consthuctron Supervision របស់សាធាណរដ្ឋចិន សាងសង់តាមលក្ខណៈបច្ចេកទេសស្ថិតក្នុងស្ដង់ដាហាយវ៉េចិនកំរិត១ មានគន្លងនាវាចរណ៍កំពស់១០,៨ម៉ែត្រ ធៀបនឹងកំពស់ទឹកខ្ពស់បំផុតនៅឆ្នាំ២០០០ ។ លោករដ្ឋមន្ដ្រីបន្ដថា ស្ពាននេះជាប្រភេទស្ពានបេតុងសរសៃដែក និងទាញខ្សែកាបពង្រឹងដោយចាក់បេតុងផ្ទាល់លើពុម្ពតែម្ដង។ ធ្នឹមស្ពានមានកំពស់ផ្សេងៗពីគ្នាខ្ពស់បំផុតប្រវែង៨,៧ម៉ែត្រ និងទាបបំផុតប្រវែង១,៨ ម៉ែត្រ ។ កំរាលស្ពាន និងផ្លូវភ្ជាប់ក្បាលស្ពានត្រូវបានអ៊ុតបេតុងកៅស៊ូ AC កំរាស់១១សង្ទីម៉ែត្រ ។ ស្ពាននេះត្រូវបានសាងសង់អស់រយៈពេល៣៤ខែ គិតចាប់ពីថ្ងៃទី១១ ខែ មិថុនា ឆ្នាំ២០០៧ ក្នុងតំលៃសាងសង់ចំនួន ២៨.៧៨៣.៦៦៤ដុល្លារអាមេរិកតំលៃ ទីប្រឹក្សាបច្ចេកទេស៦១៣.០៩២ដុល្លារអាមេរិក ថវិកាបដិភាគរបស់រាជរដ្ឋាភិបាល១.៤៦៩.៨៣៨ដុល្លារអាមេរិកសំរាប់សំណង ផលប៉ះពាល់ពីគំរោង ដោយមិនទាន់បញ្ចូលការទទួលបន្ទុកបង់ពន្ធលើការនាំចូលសំភារបរិក្ខារសំរាប់ការសាងសង់មួយចំនួនទៀត។ សរុបការចំណាយថវិកាសំណង់ស្ពានព្រែកក្ដាមមានចំនួន៣០.៨៦៦.៥៩៤ដុល្លារអាមេរិក ។ ការសាងសង់នេះត្រូវបានបញ្ចប់មុន ផែនការកំណត់១៥ខែ ។ ដោយឡែកផ្លូវជាតិលេខ៦១ ដែលត្រូវបើកការដ្ឋាននេះប្រវែង១៦គីឡូម៉ែត្រ ត្រូវសាងសង់ដោយក្រាលកៅស៊ូបេតុង(AC) មានទទឹង១០ម៉ែត្រ ក្នុងតំលៃ៩.៧៦០.០០០ដុល្លារអាមេរិក ដោយប្រើប្រាស់ថវិកាសន្សំ ឬហៅថា សមតុល្យឥណទានកម្ចីដែលសល់ពីការសាងសង់ស្ពានព្រែកក្ដាម និងស្ពានព្រែកតាមាក់ សាងសង់ និងត្រួតពិនិត្យបច្ចេកទេសដោយក្រុមហ៊ុនសំណង់សៀងហៃរបស់សាធារណរដ្ឋប្រជាមានិតចិន ។ លោកផាន គងស៊ា ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា បានថ្លែងថា ស្ពានមិត្ដភាពកម្ពុជា-ចិនព្រែកក្ដាម នេះគឺជាការបញ្ជាក់ឱ្យឃើញយ៉ាងច្បាស់អំពីការយកចិត្ដទុកដាក់ និងការគាំទ្រដ៏ល្អប្រសើរពីរាជរដ្ឋាភិបាលកម្ពុជា ។ ស្ពានព្រែកក្ដាមជាស្ពានឆ្លងកាត់ទន្លេសាប ហើយដោយមានការ យកចិត្ដទុកដាក់គាំទ្រពីសម្ដេចតេជោនាយករដ្ឋមន្ដ្រី ហ៊ុន សែន ស្ពានព្រែកក្ដាមបានសាងសង់រួចរាល់ជាស្ថាពរ ។ ផ្លូវជាតិលេខ៦A ត្រូវសាងសង់ផ្សារភ្ជាប់ពីផ្លូវជាតិលេខ៥ ទៅផ្លូវជាតិលេខ៦A ជាផ្លូវសេដ្ឋកិច្ចដ៏ល្អសំរាប់ប្រជាពលរដ្ឋរស់នៅក្នុងតំបន់នេះ ហើយនឹងក្លាយទៅជាផ្លូវសំខាន់មួយក្នុងតំបន់ដែលនឹងជួយជំរុញុយ៉ាងសកម្មដល់កិច្ចអភិវឌ្ឍន៍សេដ្ឋកិច្ចសង្គម ហើយនិងជាបណ្ដាញដឹកជញ្ជូនយ៉ាងសំខាន់សំរាប់ប្រទេសកម្ពុជា ។ លោកផាន គងស៊ា បន្ដថា សម្ដេចតេជោនាយករដ្ឋមន្ដ្រីតែងមានប្រសាសន៍ថា មានផ្លូវគឺមានសង្ឃឹមមានផ្លូវគឺមានការអភិវឌ្ឍន៍។ ប្រទេសចិនក៏មានសុភាសិតមួយមានន័យដូចគ្នាដែរគឺ បើចង់មានត្រូវកសាងផ្លូវ ។ រដ្ឋាភិបាលនិងប្រជាជនចិនបានយល់ច្បាស់អំពីសេចក្ដីតំរូវការរបស់ប្រជាពលរដ្ឋកម្ពុជា ហើយក៏បានផ្ដល់នូវការគាំទ្រយ៉ាងពេញទំហឹងឆ្លើយតបចំពោះកាខិតខំប្រឹងប្រែងរបស់រដ្ឋាភិបាលកម្ពុជា ក្នុងការកាត់បន្ថយភាពក្រីក្រ និងការកសាងសមត្ថភាព ។ ជាក់ស្ដែងនៅឆ្នាំនេះ បានបញ្ចប់នូវគំរោងសាងសង់ហេដ្ឋារចនាសម្ព័ន្ធមួយចំនួនដែលជាកិច្ចសហប្រតិបត្ដិការរវាងចិន និងកម្ពុជារួមមានផ្លូវជាតិលេខ៧៦ លេខ៨ ពីព្រែកតាមាក់ឆ្លងកាត់ទន្លេមេគង្គផ្លូវជាតិលេខ៥៧ និងផ្លូវជាតិលេខ៦២ ។ លោកសង្ឃឹមថា គំរោងទាំងនេះមិនគ្រាន់តែដើរតួនាទីជាវិជ្ជមានក្នុងការអភិវឌ្ឍន៍សេដ្ឋកិច្ចសង្គម និងការលើកស្ទួយកំរិតជីវភាពរបស់ប្រជាពលរដ្ឋកម្ពុជាប៉ុណ្ណោះទេ គឺថែមទាំងពង្រឹងកិច្ចសហប្រតិបត្ដិការរវាងចិននិងកម្ពុជាសំរាប់ការអភិវឌ្ឍន៍ជាមួយគ្នា។ មានប្រសាសន៍សំណេះសំណាលក្នុងឱកាសនោះ សម្ដេចអគ្គមហាសេនាបតីតេជោ ហ៊ុន សែន បានសំដែងនូវសេចក្ដីរីករាយដែលសាធារណរដ្ឋប្រជាមានិតចិនផ្ដល់នូវជំនួយក៏ដូចជាឥណទានយ៉ាងសន្ធឹកសន្ធាប់សំរាប់បំរើឱ្យការអភិវឌ្ឍន៍វិស័យហេដ្ឋារចនាសម្ព័ន្ធនៅកម្ពុជា ។ សម្ដេចតេជោនាយករដ្ឋមន្ដ្រីមានប្រសាសន៍ថា តាំងពីកកើតទឹកដីកម្ពុជាមកនេះ គឺជាលើកដំបូងដែលយើងមានស្ពានព្រែកក្ដាមមួយនេះសំរាប់ប្រើប្រាស់ជំនួសឱ្យការឆ្លងសាឡាង ។ ចិនបានជួយកម្ពុជាលើវិស័យអាទិភាពទាំង៤ដែលបានដាក់តាំងពី២០ឆ្នាំមុន គឺទឹកសំរាប់វិស័យកសិកម្ម ផ្លូវ ភ្លើង និងមនុស្សនៅតែត្រូវ ហើយអាចនឹងត្រូវសំរាប់រយៈពេល២០ឆ្នាំទៀត ។ ចិនចាប់ផ្ដើមការដ្ឋាន ធារាសាស្ដ្រនៅបាត់ដំបងមុនគេ ហើយឥឡូវកម្ពុជាកំពុងចរចានៅកំពង់ត្របែក និងបណ្ដាការដ្ឋានមួយចំនួនទៀតកំពុងតែអនុវត្ដនូវគំរោងការឥណទានរបស់ចិនចំពោះវារីអគ្គិ សនីចិនបានជំរុញអ្នកវិនិយោគដូចជាវារី អគ្គិសនីកំចាយ គិរីរម្យ អាតៃ អារ៉ៃ ឫស្សីជ្រំ និងការចែកចាយ និងបណ្ដុះបណ្ដាលធនធានមនុស្សដែលមានសាលាកសិកម្មព្រែកលៀប បូកជាមួយនឹងការជួយបណ្ដុះបណ្ដាលធនធានមនុស្សដែលបានបញ្ជូនទៅរៀននៅប្រទេសចិនផងដែរ ។ សម្ដេចតេជោនាយករដ្ឋមន្ដ្រីបានលើកឡើងថា ឥឡូវប្រជាពលរដ្ឋលែងមានការលំបាកទៀតហើយ កាលពីមុនប្រជាពលរដ្ឋតែងតែរង់ចាំ និងមានការលំបាករហូតមានទំនាស់គ្នាទៀត ។ ស្ពានព្រែកក្ដាមបានបង្ក លក្ខណៈងាយស្រួលកាត់បន្ថយការលំបាករបស់ប្រជាពលរដ្ឋហើយ ដូច្នេះបើកបរឱ្យតែត្រូវច្បាប់ចរាចរណ៍បានហើយ ។ សម្ដេចតេជោមានប្រសាសន៍ថា ខ្ញុំឯកភាពជាមួយនឹងឯកអគ្គរដ្ឋទូតចិន ដោយនៅថ្ងៃទី១ មិថុនា ជាទិវាកុមារអន្ដរជាតិ ខ្ញុំឧទ្ទិសស្ពាននេះ សំរាប់កុមាររបស់យើង យើងធ្វើសព្វថ្ងៃ គ្មានអ្វីក្រៅតែដើម្បីទុកឱ្យអ្នកជំនាន់ក្រោយ គឺកុមាររបស់យើងដែលគេនឹងទទួលផលពីអ្វីដែលយើងបាននិងកំពុងខិតខំ ។ ប្រហែលជាពួកគេមិនស្ដីបន្ទោសយើងនោះទេ និយាយដូច្នេះមិនមានន័យថា យើងចង់បន្ទោសដល់អ្នកជាន់មុនទេ ក៏ប៉ុន្ដែដំណាក់កាលណាក៏ដោយ វាមានចំណុចពិសេសរបស់វា ។ ជួនកាលចង់អភិវឌ្ឍន៍ លុះអភិវឌ្ឍន៍បានហើយត្រូវផ្ដាច់ទៅវិញក៏មានដែរ ដូចជាស្ពានជ្រោយចង្វាជាដើមត្រូវដាក់មីនកំទេចដើម្បីផ្ដាច់ ។ ស្ពានជាច្រើនត្រូវបានសង្គ្រាមបំផ្លិចបំផ្លាញ ហើយយើងធ្លាក់ទៅក្នុងស្ថានភាពមួយដែលបាត់បង់ពេលវេលាយ៉ាងច្រើន តែឥឡូវពេលវេលាបានមកដល់ហើយសំរាប់ការកសាងរបស់យើង ។ ក្នុងឱកាសនោះ សម្ដេចតេជោនាយករដ្ឋមន្ដ្រីបានស្នើសុំកុំឱ្យបើកលឿនផ្ទុកទំនិញ ហួសចំណុះកំណត់ដែលធ្វើឱ្យឆាប់ខូចផ្លូវនិងស្ពាន ហើយបើមានគ្រោះថ្នាក់សូមកុំបន្ទោសអ្នកធ្វើផ្លូវ ៕(ដកស្រង់ពីគេហទំព័រកាសែតកោះសន្តិភាព)
No comments:
Post a Comment