ខេត្ដកំពត ៖ ប្រជាពលរដ្ឋនៅតាមព្រំដែនវៀតណាម ដែលមានរបរមួយទៀតគឺនាំគោទៅលក់ឱ្យវៀតណាម បានត្អូញត្អែរពីការគាបសង្កត់របស់ភ្នាក់ងារក្រុមហ៊ុនចំនួន២ ដែលសំអាងថា ពួកខ្លួនមានច្បាប់អនុញាតឱ្យ នាំសត្វពាហនៈឆ្លងកាត់ទៅកាន់ប្រទេសវៀត ណាមផ្ដាច់មុខ និងបានឈរជើងនៅគ្រប់ គោលដៅនៃច្រករបៀងផ្សេងៗទាំងអស់ តាមខ្សែបន្ទាត់ព្រំដែន សំរាប់ចាំស្ទាក់ទារលុយពីអ្នករកស៊ីដឹកគោចុះទៅប្រទេសវៀតណាម ។ប្រជាពលរដ្ឋម្នាក់ក្នុងចំណោមអ្នករកស៊ី ដឹកគោជាច្រើនរយនាក់ បាននិយាយរៀបរាប់ ថាកាលពីឆ្នាំ២០០៥ មានដង្ខៅគោជាច្រើន ដើរទិញគោទាំងតូចទាំងធំពីប្រជាពលរដ្ឋស្ទើរតែអស់ពីក្នុងស្រុក-ភូមិ តែប៉ុន្មានឆ្នាំចុង ក្រោយនេះ ក៏មានក្រុមហ៊ុន២ ដើរប្រមូលទិញគោចង់អស់ដែរ ដោយគេសំរុកដឹកចេញ ទៅប្រទេសក្រៅ គឺប្រទេសសៀម និងប្រទេសវៀតណាម ។
ក្រុមឈ្មួញគោបាននិយាយថា ពួកគាត់មិនខ្វល់ពីរឿងក្រុមហ៊ុន ទាំងនោះដឹកជញ្ជូនគោទេ ប៉ុន្ដែអ្វីដែលលំបាកជាងគេ គឺពួកគាត់នៅជាប់នឹងប្រទេសវៀតណាម តែងតែរកទិញគោពីប្រជាពលរដ្ឋមួយនឹម ឬ២នឹមដឹកឆ្លងទៅលក់នៅប្រទេសវៀតណាម ប៉ុន្ដែស្រាប់តែមានភ្នាក់ងារក្រុមហ៊ុនចំនួន២ បែរជាអង្គុយចាំយកលុយដោយតំរូវឱ្យបង់ក្នុងគោមួយក្បាល៨ម៉ឺនរៀលទៅវិញ។ បើមិនបានមួយក្បាល៨ម៉ឺនរៀលទេ គេមិនអនុញាតឱ្យនាំគោឆ្លងកាត់បានទេ ។ ក្រុមអ្នកជួញដូរគោបាននិយាយបន្ដថា ទោះបីជាពេទ្យសត្វស្រុកបានចេញលិខិតឱ្យក៏ដោយ ក៏នៅតែភ្នាក់ងាររបស់ក្រុមហ៊ុនទាំងនោះបញ្ជាឱ្យបង់លុយដែរ ។
មន្ដ្រីយោធា និងមន្ដ្រីប៉ូលិសការពារព្រំដែននិយាយថា ពីមុនការនាំគោក្របីទៅកាន់ប្រទេសវៀតណាម ពួកគាត់បានលុយចំណូល ពីដង្ខៅគោគ្រាន់បានចែកគ្នាចាយ តែឥឡូវ គោ១ឡាន ក្រុមហ៊ុនគេបង់ឱ្យបានតែ២ម៉ឺន រៀល ទៅ២ម៉ឺន៥ពាន់រៀលប៉ុណ្ណោះ ។ លោកសូ វិទូ ប្រធានពេទ្យសត្វខេត្ដធ្លាប់ បាននិយាយប្រាប់អ្នកយកព័ត៌មានកោះសន្ដិភាពថា គោរបស់ក្រុមហ៊ុន ពេទ្យសត្វខេត្ដមិន បានធ្វើការត្រួតពិនិត្យទេ ដោយសារតែគេ មានច្បាប់ ។ តែបើមានគោឈឺទើបចុះទៅ ពិនិត្យដើម្បីចៀសវាងការកើតមានជំងឺឆ្លង ដល់គោដែលគេដឹកយកមកស្ដុកទុកក្នុងក្រោលតាមព្រំដែន ។(ដកស្រង់ចេញពីគេហទំព័រ កាសែតកោះសន្តិភាព)
No comments:
Post a Comment