កងទ័ពខ្មែរ-សៀម បាញ់គ្នាមួយប្រាវ នៅតំបន់ឈូករុន ស្រុកត្រពាំងប្រាសាទ

ខេត្តឧត្តរមានជ័យៈ ប្រភពព័ត៌មានរាយការណ៍ ឱ្យដើមអម្ពិលដឹងថា នៅវេលាម៉ោង ៩ និង ៥០នាទីព្រឹកថ្ងៃទី ៨ ខែ មិថុនា ឆ្នាំ ២០១០ នេះ មានការពើបប្រយុទ្ធគ្នាមួយប្រាវ រវាងកងទ័ពកម្ពុជា និងកងទ័ពសៀមឈ្លានពាន  ស្ថិតនៅចំណុចអូរចំបក់ ជិតតំបន់ឈូករុន ក្នុងស្រុកត្រពាំងប្រាសាទ ខេត្តឧត្តរមានជ័យ។

នាយឧត្តមសេនីយ៍ ជា តារា អគ្គមេបញ្ជាការរងកងយោធពលខេមរភូមិន្ទ បានប្រាប់ដើមអំពិលថាការពើបប្រយុទ្ធគ្នាកើត ឡើងនៅគ្រាដែលកងទ័ពកម្ពុជា ១៥នាក់ដើរល្បាតតាមព្រមដែន ស្រាប់តែពួកទាហានសៀម បើការវាយប្រហារដោយ កាំភ្លើង M16និង M79 មកលើកងទ័ពកម្ពុជាតែម្តង ។ ភ្លាមនោះកងទ័ពកម្ពុជា បានបាញ់ប្រហារទៅកងទ័ពសៀមវិញ ដោយកាំភ្លើង PKM ។ យោងតាមប្រភពគេជឿថា កងទ័ពសៀមមានស្លាប់ និងរបួសក្នុងការប្រយុទ្ធគ្នានេះ ប៉ុន្តែកងទ័ពកម្ពុជាពុំមានគ្រោះថ្នាក់អ្វីទេ។

(ដកស្រង់ចេញពីគេហទំព័រ ដើមអំពិល)