ភ្នំពេញ: សម្តេចតេជោហ៊ុន សែន បានស្ថិតនៅក្នុងចំណោមមេដឹកនាំប្រទេសមួយចំនួន ដែលចូលរួមក្នុងវេទិកាសេដ្ឋកិច្ចពិភពលោក (WEF) លើកទី១៩ ស្តីពីអាស៊ីខាងកើត ដែលបានបើកប្រជុំនៅទីក្រុងហូជីមិញ(ព្រៃនគរ) ប្រទេសវៀតណាមកាលពីថ្ងៃអាទិត្យ ។ វេទិការមានប្រធានបទថា “គិតឡើងវិញពីរបៀបវារៈភាពជាអ្នកដឹកនាំរបស់អាស៊ី” មានឥស្សរជនជាង ៤០០នាក់ ចូលរួមដែលឥស្សរជនទាំងនោះជា ថ្នាក់ដឹកនាំនិងជាមន្ត្រីរដ្ឋាភិបាល, ជាអ្នកសិក្សា និងជាសហគ្រិនឈានមុខមកពីប្រទេសជាង៥០ ។
លោកង្វៀន តឹន យុង នាយករដ្ឋមន្ត្រីវៀតណាម បានថ្លែងសុន្ទរកថាក្នុងថានៈជាម្ចាស់ផ្ទះដោយគូសបញ្ជាក់ថា “ជាមួយនឹងការផ្លាស់ប្តូរយ៉ាងខ្លាំងក្លានៅក្នុងតុល្យភាពនៃអំណាច និងអំណាចសេដ្ឋកិច្ចក្រោយពេលមានវិបត្តិ ការទទួលខុសត្រូវជាសាកលដែលប្រកាន់យកដោយប្រទេសអាស៊ីខាងកើត ត្រូវការឲ្យមានការទទួលស្គាល់ និងការវាយតម្លៃឡើងវិញឲ្យបានត្រឹមត្រូវ ។ អាស៊ី ខាងកើតបានប្រកាន់យកជំហរដ៏ប្រពៃដើម្បីបង្កើតការចូលរួមយ៉ាងសកម្ម ក្នុងការអភិវឌ្ឍន៍អភិបាលកិច្ចជាសាកលមួយថ្មី មានប្រសិទ្ធភាពជាងមុន និងមានរចនាសម្ព័ន្ធប្រជាធិបតេយ្យជាងមុន” ។
ក្នុងសន្និសីទរយៈពេលពីរថ្ងៃ (៦-៧ មិថុនា) អ្នកចូលរួមនឹងពិភក្សាលើប្រធានបទសំខាន់បួនគឺៈ របៀបវារៈភាពជាអ្នកដឹកនាំរបស់អាស៊ី, ហានិភ័យជាសាកល, កំណើនប្រកបដោយចីរភាព និងមានភាពបៃតង និងភាពប្រកួតប្រជែងរបស់តំបន់ក្នុងសេដ្ឋកិច្ចសាកលមួយ ។
វេទិការសេដ្ឋកិច្ចពិភពលោក មានមូលដ្ឋាននៅទីក្រុងហ្សឺណែវ ប្រទេសស្វីស គឺជាអង្គការអន្តរជាតិឯករាជ្យ និងមិនស្វែងរកប្រាក់ចំណេញមួយ។វេទិការសេដ្ឋកិច្ចពិភពលោកស្តីពី អាស៊ីខាងកើតគឺជាព្រឹត្តិការណ៍មួយដែលរៀបចំប្រចាំឆ្នាំនៅអាស៊ី ៕
(ដកស្រង់ចេញពីគេហទំព័រ ខេមបូឌាអេចបេ្រសញូស៏)
No comments:
Post a Comment