ភ្នំពេញ: នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា កាលពីព្រឹកថ្ងៃទី៨ មិថុនាកន្លងទៅនេះ បានរៀបចំពិធីបើកវគ្គបណ្តុះបណ្តាលគ្រូឧទ្ទេសនាមច្បាប់ស្តីពីកិច្ចការពារ និងលើកកំពស់ជនពិការ ក្រោមអធិបតីភាពលោក អ៊ិត សំហេង រដ្ឋមន្ត្រីក្រសួងសង្គមកិច្ច ដោយមានការចូលរួមពីមន្ត្រីជំនាញតាមនាយកដ្ឋាន ខេត្ត រាជធានី មជ្ឈមណ្ឌលស្តារ និងអង្គការពាក់ព័ន្ធនានាចំនួន ១៥០នាក់ ។ លោក អ៊ិត សំហេង មានប្រសាសន៍ថា វគ្គបណ្តុះបណ្តាលថ្ងៃនេះរៀបចំឡើង ក្នុងគោលបំណងផ្តល់ចំណេះដឹងជាមូលដ្ឋាន អំពីខ្លឹមសារច្បាប់ស្តីពីកិច្ចការពារ និងលើកកំពស់សិទ្ធិជនពិការ ដល់ថ្នាក់ដឹកនាំ និងមន្ត្រីជំនាញនៃនាយកដ្ឋាននានា របស់ក្រសួងមន្ត្រីជំនាញ នៃមន្ទីរសង្គមចិក្ចរាជធានី ខេត្ត ដើម្បីឲ្យក្លាយជាគ្រូបង្គោលសម្រាប់ឧទ្ទេសនាម និងផ្សព្វផ្សាយច្បាប់នេះបន្តដល់បណ្តាក្រសួងស្ថាប័ន ផ្នែកឯកជន អង្គការជាតិអន្តរជាតិ ប្រជាពលរដ្ឋ ជនពិការ និងសហគមន៍ សំដៅបំផុសការយល់ដឹង និងជំរុញការចូលរួមអនុវត្តច្បាប់ ឲ្យមានប្រសិទ្ធភាពខ្ពស់ ។
លោករដ្ឋមន្ត្រីមានប្រសាសន៍ទៀតថា ក្នុងវគ្គបណ្តុះបណ្តាលរយៈពេល ២ថ្ងៃនេះ សិក្ខាកាមទាំងអស់ នឹងទទួលបាននូវចំណេះដឹងថ្មី ជាគន្លឹះសំខាន់ៗ អំពីអត្ថន័យ និងខ្លឹមសារ ដែលមានចែងនៅក្នុងមាត្រានីមួយៗ នៃច្បាប់នេះ ។ តាមរយៈបទឧទ្ទេសនាម និងការពន្យល់របស់វាគ្មិនរបស់យើង ដើម្បីពង្រឹងនូវសមត្ថភាព វិជ្ជាជីវៈ ក្នុងការបំពេញមុខងាររបស់ខ្លួន ទាក់ទងក្នុងការអនុវត្តក្នុងតួនាទីជាមន្ត្រីសង្គមកិច្ច និងជាអ្នកបំរើការងារលើវិស័យពិការភាព និងជំរុញការចូលរួមអនុវត្តច្បាប់នេះ ឲ្យមានប្រសិទ្ធភាពខ្ពស់ ៕(ដកស្រង់ចេញពីគេហទំព័រ ខេមបូឌាអេចបេ្រសញូស៏)
No comments:
Post a Comment