តាមពត៌មានក្នុងស្រុក ដកស្រង់សំដីរបស់លោក ឯក ស៊ុនចាន់ បានរាយការណ៍កាលពីថ្ងៃអង្គារ៍នេះ ឲ្យដឹងថា ប្រាក់ចំណូលរបស់អាជ្ញាធររដ្ឋាករទឹករាជធានីភ្នំពេញ កើនឡើងបាន ១១% ក្នុងកំឡុងពេល ៥ខែ ដំបូងក្នុងឆ្នាំនេះ ប្រៀបធៀបទៅនឹងរយៈពេលដូចគ្នាក្នុងឆ្នាំ២០០៩។លោក ឯក ស៊ុនចាន់ និយាយ នៅក្នុងសន្និសីទកាសែតមួយដែលប្រកាសថា អាជ្ញាធររដ្ឋាកររាជធានីភ្នំពេញបានឈ្នះពានរង្វាន់ Stockholm ឆ្នាំ២០១០ នេះថា អាជ្ញាធររដ្ឋាករទឹក អាចរកប្រាក់ចំណូលបានដល់ទៅ ១០លានដុល្លារ ដែលប្រាក់ចំណូលនេះ អាជ្ញាធររដ្ឋាករទឹកមិនទាន់បានធ្វើបញ្ជីត្រួតពិនិត្យបញ្ចប់ នៅចុងខែឧសភានៅឡើយទេ។
"ប្រាក់ចំណូលដែលកើនឡើងនេះ ជាលទ្ធផលស្របពេលដែលអ្នកប្រើប្រាស់ថ្មីកើនឡើង ដូចដែលសេដ្ឋកិច្ចរាជធានីភ្នំពេញ កើនឡើង បន្ទាប់ពីមានវិបត្តិសេដ្ឋកិច្ច" ដកស្រង់សំដីលោកចេញពីកាសែតភ្នំពេញប៉ុស្តិ៍។
តាមស្ថិតិអាជ្ញាធររដ្ឋាករទឹករាជធានីភ្នំពេញ បានបង្ហាញឲ្យដឹងថា អាជ្ញាធររដ្ឋាករទឹក អាចបង្កើតប្រាក់ចំណូលជាមធ្យមបាន ២លានដុល្លារ ក្នុងមួយខែ លើការផ្គត់ផ្គង់ទឺកនៅក្នុងរាជធានីភ្នំពេញចាប់ តាំងពីខែមករា ស្មើនឹង ១១% កើនឡើងច្រើនជាង ប្រាក់ចំណូលជាមធ្យម ១,៨លាន ក្នុងមួយខែ កំឡុងពេល ៥ខែដំបូងកាលពីឆ្នាំមុន។
លោក ឯក ស៊ុនចាន់ បាននិយាយថា អាជ្ញាធររដ្ឋាករទឹករាជធានីភ្នំពេញ លក់ទឹកក្នុង ១ម៉ែត្រគូប តម្លៃ ០,២៥ដុល្លារ រក្សាតម្លៃទឹកឲ្យមានតម្លៃថោក តាមរយៈការរក្សាអត្រាទាបបំផុត ប្រមាណជា ៦,៣%។ លោក ឯក ស៊ុនចាន់ បានបន្តថា អាជ្ញាធររដ្ឋាករទឹករាជធានីភ្នំពេញ មានគម្រោងពង្រីកផលិតកម្មខ្លួន ដោយធ្វើការសាងសង់នូវស្ថានីយប្រព្រឹត្តិកម្មទឹកទី៣ ដែលមានតម្លៃ ៨០លានដុល្លារ នៅចុងឆ្នាំ២០១០នេះ ដែលអាចផលិតទឹកបានប្រមាណជា ១៣០.០០០ម៉ែត្រគូប ក្នុងមួយថ្ងៃ។
ផ្អែកតាមពត៌មានដែលទទួលបានមកពីអាជ្ញាធររដ្ឋាករទឹក បច្ចុប្បន្ននេះ អាជ្ញាធររដ្ឋាករទឹករាជធានីភ្នំពេញ មានស្ថានីយ៍ប្រព្រឹត្តិកម្មទឹកចំនួន ២ស្ថានីយ៍ ដែលអាចផលិតទឹកសរុបបាន ៣០០.០០០ម៉ែត្រគូប ក្នុងមួយថ្ងៃ ហើយធ្វើការចែកចាយទៅអតិថិជនតាមរយៈបណ្តាញបំពង់ទឹកដែលមានចម្ងាយ ១.៧៨៣គីឡូម៉ែត្រ។ ស្ថានីយ៍ទឹកនេះ មានទីតាំងនៅភូមិព្រែក ឃុំជ្រោយចង្វារ។
អាជ្ញាធររដ្ឋាករទឹក មានគម្រោងផលិតទឹកស្អាតឲ្យបាន ៤៣០.០០០ម៉ែត្រគូប ក្នុងមួយថ្ងៃ ហើយធ្វើការចែកចាយទៅតាមបណ្តាញបំពង់ទឹក ចម្ងាយ ២.៣០០គីឡូម៉ែត្រ។ អាជ្ញាធររដ្ឋាករទឹក មានបំណងធ្វើការចែកចាយទឹកស្អាតឲ្យបាន ៥៦០.០០០ម៉ែត្រគូប តាមរយៈបណ្តាញបំពង់ទឺកប្រវែង ២.៨០០គីឡូម៉ែត្រ នាឆ្នាំ២០២០៕
(ដកស្រង់ចេញពីគេហទំព័រ នគរវត្ត)
រកលុយបានច្រើនតើរដ្ឋករទឹក ឃើញថាខាងផ្នែកគាត់បានពាន់រង្វន់ពីរដឹងមកខាងទឹកស្អាតនឹង
ReplyDelete