ធនាគារជាតិកម្ពុជាបានដាក់ប្រាក់ ៣លានដុល្លារបន្ថែមទៀត ទិសដៅទិញប្រាក់រៀល ក្នុងការដេញថ្លៃមួយដើម្បីធ្វើឲ្យប្រាក់រៀលមានស្ថេរភាព ដែលក្នុងសប្ដាហ៍ថ្មីៗនេះប្រាក់រៀលបានចុះថ្លៃ។
តាមសេចក្តីប្រកាសកាលពីថ្ងៃច័ន្ទ ដែលបានឃើញនៅថ្ងៃអង្គារ៍កន្លងមកនេះ ពីធនាគារជាតិកម្ពុជាដែលបានយល់ព្រមដោយអគ្គនាយកធនាគារជាតិកម្ពុជា តាល ណៃអ៊ឹម បានឲ្យដឹងថា ធនាគារជាតិបានដាក់លុយ ១លានដុល្លារក្នុងការដេញថ្លៃនីមួយៗកាលពីថ្ងៃច័ន្ទ ថ្ងៃពុធ និងថ្ងៃសុក្រ ក្នុងសប្តាហ៍នេះ។ អ្នកដេញថ្លៃ អាចជាធនាគារពាណិជ្ជ អ្នកទទួលបានអាជ្ញាប័ណ្ណឲ្យធ្វើការប្តូរប្រាក់ និងក្រុមហ៊ុន។
មន្ត្រីធនាគារកណ្តាលម្នាក់ ដែលមិនបញ្ចេញឈ្មោះ បាននិយាយថា "ការដាក់ដេញថ្លៃតម្លៃ ១លានដុល្លារ កាលពីថ្ងៃច័ន្ទ មានអ្នកប្តូរប្រាក់ចំនួន ៩នាក់ បានចូលរួម។ ជាលទ្ធផល ហាងប្តូរប្រាក់ វង្ស រិទ្ធី នៅក្បែរផ្សារអូឡាំពិច រាជធានីភ្នំពេញ បានឈ្នះលើការដេញថ្លៃ ដោយប្រាក់រៀល ៤.២៣២រៀល ស្មើនឹងប្រាក់ដុល្លារ ១ដុល្លារ"។
កាលពីថ្ងៃអង្គារ៍នេះ ប្រាក់រៀលបានធ្លាក់ចុះ ១,៦៧% ពី ៤.២០៦រៀលក្នុង១ដុល្លារ មកត្រឹម ៤.១៩០រៀលក្នុង១ដុល្លារ ចាប់ពីពាក់កណ្តាលខែមេសាមកម៉្លេះ។
នេះជាលើកទី២ហើយដែលធនាគារជាតិកម្ពុជាលូកដៃចូលក្នុងករណីនេះ ដើម្បីធ្វើឲ្យប្រាក់រៀលមានស្ថេរភាព បន្ទាប់ពីប្រាក់ដុល្លារដាក់ដេញថ្លៃ ៤លានដុល្លារ ក្នុង២សប្តាហ៍ចុងក្រោយនេះ។
ក្រុមអ្នកវិភាគបានធ្វើការវាយតម្លៃថា ថវិកាប្រមាណជា ៥០០លានដុល្លារនៃប្រាក់រៀល ត្រូវបានធ្វើចរាចរណ៍នៅកម្ពុជា ហើយថ្មីៗនេះការធ្លាក់ចុះនៃប្រាក់រៀល ដោយសារតែប្រាក់ដុល្លារ និងប្រាក់ដុល្លារដែលហូរចូលមកកម្ពុជាតាមរយៈការវិនិយោគ និងពាណិជ្ជកម្ម រួមទាំងថ្មីៗនេះប្រាក់អឺរ៉ូក៏ធ្លាក់ចុះដែរ៕
(ដកស្រង់ចេញពីគេហទំព័រ នគរវត្ត)
No comments:
Post a Comment